Reportajen Umbelina dos Reis
Ministériu Solidariedade Sosial Inkluzaun (MSSI), liu hosi Diretór Nasionál ba Promosaun Direitus Humanus Portadores Defisiénsia (DNPDHPD,) kontinua apoiu organizasaun defisiénsia iha Timor-Leste, nune’e oinsá asegura koneksaun direitu ema ho defisiénsia (EhD) nian, hodi promove defisiénsia kontinua faz parte halo servisu hamutuk ho governu nian, nune’e labele husik ema ida iha kotuk.
Diretor DNPDHPD, Mateus da Silva hateten, tinan ida ne’e Ministériu Solidariedade Sosial Inkluzaun (MSSI), fo apoiu ba organizasaun Ema ho Defisiensia (EhD), hamutuk (7) hanesan asosiasaun halibur defisiénsia matan Timor-Leste (AHDMTL), Klibur domin, São Joao de Deus, Mari yosep, no Madre Alma sira.Oinsá promove sira hodi kontinua servisu hamutuk ho governu hodi luta ba direitu no inkluzaun sosial.
“Ministériu Solidariedade Sosial Inkluzaun (MSSI), kontinua apoiu organizasaun defisiénsia sira nia nesesidade bázika, nune’e sira servisu hamutuk ho governu iha área inkluzaun sosial nian, liga ba Ema ho Defisiensia (EhD) nia direitu ho nesesidade, oinsá promove sira ba futuru, tanba tuir tema iha semináriu ne’e dehan, defisiénsia tenki sai protetor no promotor, entaun governu kontinua asegura organizasaun EhD nian para servisu liu hosi meius oin-oin, hanesan estudu nasionál, liu hosi asisténsia sosial kontinua apoiu ai-han ba maluk defisiénsia sira.” dehan diretór DNPDHPD Mateus da Silva, ba Jornalista sira iha Salaun Ministériu Transporte ba Komunikasaun (MTK), Kaikoli Merkadu-Lama, sexta-feira 07/07
Nia dehan, bainhira halo asesmentu atu identifika maluk defisiésia ne’ebé kondisaun susar, entaun sira bele hetan apoiu pontual, dadauk ne’e simu ona rezultadu asesmentu liu hosi relatoriu sosial nian, entaun ekipa sei halo avaliasaun ba iha proposta sira ne’e, hafoin sé mak elizibel hodi asesu ba iha apoiu kulturál.
“Governu kontinua servisu hamutuk ho organizasaun defisiénsia sira iha Timor-Leste, hodi establese konsellu nasionál ba maluk defisiésia sira, nune’e asegura hodi implementa koneksaun direitu ba Ema ho Defisiénsia (EhD) nian ne’ebé mak liu hosi estadu Timor-Leste ni-nia komitmentu ratifika ona konvensaun hamutuk ho Organizasaun Sosiedade Sivil (OSS), no liña ministerial sira hodi implementa konvensaun ba espesifikamente tuir duni iha konstituisaun Repúblika Demokratika Timor-Leste (RDTL), ne’ebé mensiona iha artigu 16 ho 21.” nia konklui.
