Home Notisia UNPAZ Reativa Atividade Eskola, Estudante Barak Mak La Kumpri Regras Covid-19

UNPAZ Reativa Atividade Eskola, Estudante Barak Mak La Kumpri Regras Covid-19

1223
0
Universidade Paz (UNPAZ). [Foto: Santina LDC | 11.06.2020]

Reportazen Santina Lucia da Costa

Univiersidade da Paz (UNPAZ) hahu reativa ba atividade Estajio Sosial kuantidade estudante finalista, ne’ebe mak partisipa iha atividade Estajio Sosial hamutuk ema 1718, ne’ebe mai husi fakuldade 6,  partisipa atividade estajio sosial.

Hanesan fakuldade Saude Publika, Ekonomia, Siensia Sosiais Humana, Direitu, Enjeneria, Teknolojia no Agrikultura ho otal departamentu 24.

Reitor UNPAZ, Adolmando Soares Amaral ba jornalista sira hateten, universidade reativa ona, no universidade prepara maskra, ho total 2000 no prepara bee torneira 10 ne’ebe funsiona iha oras 24 nia laran.

“Ami nia espasu mak labele halo duni distansia sosial, mais ami nafatin organiza-an, para kumpri regra distansia sosial, tanba ambiente UNPAZ ladun luan”, hateten Reitor UNPAZ iha Salaun UNPAZ, 10/6.

Adolmando hateten estudante ne’ebe agora dadaun iha ne’e, mais husi semester 2, 4, 6, por volta de 8000, aumenta tan sira ema nain 1718.

Nia hateten estajiu sosial ba tinan ida ne’e la ba munisipiu, hotu-hotu konsentra de’it iha universidade, depois halo kontrola no akompanha sira, para kumpri nafatin regras ba Estadu Emerjensia, liu-liu ba distansia sosial.

“Primeiru ita komprende uluk lai moras ne’e iha Timor iha duni ka lae, povu Timor hotu-hotu hatene katak, moras ne’e moras importada, mai husi ita nia maluk timoroan, ne’ebe mai husi rai liur, tanba ne’e ita halo ona prosesu lubuk ida ba kuarentena, depois ba sala izolamentu”, dehan Adolmando Soares Amaral.

Adolamando afirma governu rasik deklara ona katak dekretu Lei ba Estadu Emerjensia datoluk ne’e bele fo oportunidade, para bele hala’o aktividades rai laran, hanesan eskola bele lao, misa bele lao.

“Mesmu to’o agora governu liuhusi Ministeriu Ensino Superior seidauk haruka karta ba ami para atu reativa aktividades, maibe ami mos reuniaun dalabarak ona ho Ministru diskuti konaba asuntu ne’e, to’o agora politika Ensino Superior atu apoiu Universidade sira, liuliu konaba torneira bee, ekipamentus atu dezenfekta, sira la realiza hotu”, hateten Adolmando Soares.

Adolmando hatutan governu halo promesa barbarak ba universidade sira, mais nunka ida atu fó, tanba ne’e mak universidade organiza-an ho osan universidade nian rasik, tenki prepera hola torneira no dezenfekta aula laran.

Iha fatin hanesan Estudante Finalista, Berta Bareto husi fakuldade Saude Publik hateten, moras Covid-19 akontese iha mundu, iha risku maibe parte husi universidade rasik foti ona risku ida ne’e, atu  nune’e ami bele akaba estudu iha tinan 2020 ne’e, “ami labele hein de’it katak Covid-19 ne’e hotu mak ami remata ami nia estudu ida ne’e”.

Estudante finalista nee hatudu nia konsiensia katak seu kolabora ho Universidade, liuhusi aplika distansia sosial, uza maskra no fase liman.

Tuir observasaun Neon Metin, maske Universidade da Paz reativa fali ona, maibe regras husi Ministeriu Saude no Organizasaun Mundial Saude nian sira la kumpri. Estudantes sira la aplika distansia sosial no distansia fiziku no maioria la uza maskra.

Print Friendly, PDF & Email

LEAVE A REPLY

Please enter your comment!
Please enter your name here