Home Notisia SEII Ho UN Women Asina Akordu Implementasaun Programa Inisiativa Spotlight UE-ONU

SEII Ho UN Women Asina Akordu Implementasaun Programa Inisiativa Spotlight UE-ONU

342
0
SEII, UN Women, UN Iha TL no UE asina akordu. [Foto: Media SEII | 10.06.2020]

Reportazen Zevonia Vieira

Sekretaria Estadu ba Igualdade no Inkluzaun (SEII) asina akordu ida ho UN Women, hanesan parte ida husi implementasaun Programa Inisiativa Spotlight millaun $13 iha Timor-Leste iha loron 10 Junhu iha salaun SEII.

Programa ne’e fundu husi União Europeia, atu ajuda governu no sosiedade sivíl iha Timor-Leste, hodi aselera esforsu ba hapara violénsia kontra feto no labarik-feto sira, hanesan parte husi vizaun global atu atinji ODS #5 kona ba Igualdade Jéneru no nia terjetu ba hapara violénsia kontra feto no labarik-feto sira iha tinan 2030.

Ho akordu ida ne’e, UN Women mós aloka ona osan ho montante $130.000 diretamente ba SEII, no sei oferese asisténsia tékniku, hodi suporta SEII ba implementasaun Planu Asaun Nasional ba Violénsia Bazeia ba Jéneru (PAN-VBJ) 2017-2021. Akordu ne’e sei kobre uluk implementasaun fulan 18 ba dahuluk nian, husi fulan Juñu 2020-Dezembru 2022.  

“UN Women parseiru ida importante ba Governu Timor-Leste, iha promosaun igualdade jéneru no inkluzaun sosiál. Violénsia hasoru feto no labarik-feto nafatin sai barreira atu atinji igualdade no atu hamosu sosiedade ida ne’ebé inkluziva. Ho asinatura akordu ida ne’e, iha ámbitu inisiativa spotlight nian, fó tan dalan ba apoiu adisionál, atu komplementa esforsu sira Governu nian, atu hakotu violénsia bazeia ba jéneru, foka liu ba prevensaun,” dehan Sra. Maria José de Jesus. 

Iha Parseria ne’e, UN Women no SEII sei kolabora ba haforsa tan implementasaun, monitorizasaun no koordenasaun ba PAN-VBJ iha nível nasionál no munisipál sira, inklui planeamentu no orsamentu ba liña ministeriál sira, hadi’a esforsu prevensaun sira bazeia ba evidénsia, aliña ho SEII nia lideransa ne’ebé tutela iha PAN-VBJ, hasa’e kapasitasaun ba analiza no uza dadus kona-ba violénsia hasoru feto, atu kria monitorizasaun no halo relatóriu ida ne’ebé forte liután, ba esforsu sira atu elimina violénsia hasoru feto no labarik-feto sira.    

Insiativu Spotlight iha Timor-Leste sei kontribui ba eliminasaun ba violénsia hodi hatán ba feto no labarik-feto sira nia presiza no haree ba kauza sira husi violénsia hasoru feto no labarik-feto sira, liuhusi utiliza aprosimasaun multi-setorál no intersesionál ba modelu ekolojikál, atu implementa intervensaun sira iha pilár neen, tuir mak hanesan lejislasaun no polítika, fortalesimentu institusionál, Prevensaun ba Violénsia, Servisu ne’ebé disponivel, asesivel no kualidade, Dadus ne’ebé loos no kualidade, no Suporta movimentu feto no organizasaun sosiedade sivíl sira.     

Iha mundu tomak, dezafiu ba violénsia hasoru feto no labarik-feto sira sei sai hanesan violénsia ida ne’ebé pervasivu ba feto sira-nia direitu umanus no obstáklu ida ba avansa igualdade jéneru.

Hodi suporta Timor-Leste nia esforsu ne’ebé la’o hela, atu prevene violénsia hasoru feto no labarik-feto sira molok akontese, no asegura responde multisetorál sira, hodi suporta sobrevivente ba violénsia doméstika sira no violénsia sira, ne’ebé komete husi parseiru íntimu sira.

Uñiao Europeia halo parseria ho ONU Timor-Leste dezenvolve Inisiativa Spotlight, hamutuk ho governu Timor-Leste liuhusi lideransa SEII no parseiru lubuk boot ida husi sosiedade sivil.    

Inisiativa Spotlight iha Timor-Leste implementa husi ajensia ONU lima (UN Women, UNDP, UNICEF, UNFPA and ILO) no parseria ho SEII no sociedade sivil lubuk ida, tutela iha lideransa Koordenador Rezidenti ONU nian no UN Women nia responsabilidade mak hanesan tekniku koherensia husi programa ne’e. 

“Ho komesa husi ita-nia instituisau laran, servisu nasionalmente ho lokalmente, no haklean tan matenek no prátika sira kona-ba prevensaun violénsia hasoru feto sira, parseria ne’e iha poténsia atu lori ita besik liután ba Timor-Leste, ida ne’ebe feto no mane sira bele goja sira-nia direitu atu moris livre husi violénsia,” hatete xefe edifisiu UN Women iha Timor-Leste, Sra. Sunita Caminha.

Vizaun jerál husi spotlight iha Timor-Leste mak hakarak haree feto no labarik-feto sira, goja sira nia direitu ne’ebé livre husi violénsia iha Timor-Leste, ida ne’ebé inklusivu no equitativu. Programa ne’e aliña ho Timor-Leste nia PAN-VBJ (2017-2021), ODS nasionál nia objetivu, partikularmente ba ODS #5 no #16.

Programa ne’e sei kontribui ba Planu Dezenvolvimentu Stratéjiku Nasionál no reinforsa Timor-Leste nia Planu Dezenvolvimentu no implementasaun, ba kompromisu sira ne’ebé tutela iha Asaun Plataforma Beijing, Konkluzaun ba Observasaun husi Komité CEDAW, no Konvensaun ba Direitu labarik, no mós kompromisiu internasionál sira seluk tan. 

Print Friendly, PDF & Email

LEAVE A REPLY

Please enter your comment!
Please enter your name here