Reportajen SIlvino Freitas
Provedoria ba Direitu Umanu no Justisa (PDHJ) hatoo ona karta ba Parlamentu Nasional, atu halo investigasaun ba prosesu rekrutamentu no Ministriu Interior (MI) atu suspende prosesu rekrutamentu kadetes foun ba ofisial PNTL nian hodi reavalia prosesu rekrutamentu tanba mosu iregularidade neebe kontra lei.
PDHJ Virgilio Guterres dehan, hafoin diresaun fiskalizasaun ho rekomendasaun halo apuramentu ba hasoru ofisial sira iha komandu PNTL nian inklui komisaun juri nian, husi averiguasaun ba faktu rekrutamentu sira neebe iha maka provedor haruka ona karta rua ida ba ministeriu interior neebe ho nia konteudu nee husu atu anula prosesu rekrutamentu nee hodi hein prosesu rekrutamentu no husu atu reavalia atu reduz preokupasaun publiku liuliu ba kandidatu sira neebe dadaun nee manifesta hela sira nia preokupasaun, nunee sira mos diriji karta ba parlamentu neebe husu atu parlamentu bele estabelese komisaun inkeritu parlamentar atu halo investigasaun, tanba dadus sira neebe PDHJ hetan ista neebe admitidu ka aprovadu atu ba tuir nee maioria polisia nia oan liuliu komadante sira neebe tuur iha juri no komadante jeral no munisipiu sira nia familia.
“PDHJ husi diresaun tolu asistensia publika, investigasaun no fiskalizasaun sei halo investigasaun klean atu haree elementus rua violasaun direitu umanu no violasaun pratika boagovernasaun iha pratika boagovernasaun nee iha elementu importante ida mak transparensia ba publiku neebe atu implika labele iha konflitu interese entre ema sira tuur iha juri no ema sira neebe compete” dehan provedor Virgilio Guterres liuhusi konferensia imprensa iha Hotel Excelsior Resort praia dos coqueiros, (09/02).
Nia dehan tan sira mos hatoo karta ba ministeriu interior husu atu kumpri akordaun tribunal rekursu nian neebe deklara katak diploma ministerial neebe rekruta ema bazeia ba estatutu social nee inkonstitusional, nune’e presiza halo reavaliasaun tanba nee tenke suspende atu reavalia hodi loke oportunidade neebe hanesan ba ema hotu sem diskriminasaun bazeia ba estadu sivil, nunee mos diskriminasaun bazeia ba estatutu social polisia nia oan veteranu nia oan, tanba nee ministeriu interior mos sira husu bainhira haree prosesu nee mosu iregularidade barak maka tenke reanunsia loke konkursu foun atu iha konkursu ida neebe transparante publiku hotu asesu laiha diskriminasaun no respeita desizaun husi tribunal neebe fo sai ona
“ami mos husu ba kandidatu foun sira atu lori provas sira hotu bele buka advogadu iha defensoria publika atu akompana sira ba tribunal kontesta hodi husu providensia kautelar atu tribunal bele foti desizaun anula prosesu nee hodi hein prosesu averiguasaun nunee posibilidade bele reinisia prosesu foun bele garante transparnasia ba hotu hotu” dehan provedor Virgilio.
Provedor Virgilio konklui ho enkorazamentu ida ba Ministeriu Interior no mos Komisariu Jeral PNTL nian no mos estrutura polisia nian tomak, buka rona no konsidera ezijensia publiku nian liuliu kandidatu sira nomos entidade hanesan PDHJ nian tanba prosesu ida laos deit kompromete integridade professional ofisial polisia nian maibe tau mos naran PNTL nee iha risku, ida nee tenke halo prosesu ida neebe ho objetivu atu restaura konfiansa publiku nian ba PNTL atu iha fiar husi publiku prosesu rekrutamentu tenke hatudu integridade transparansia no respeita regra sira.
