Home Memoria Cinco Do Oriente Uza Múzika No Kilat Reziste Hasoru Okupasaun Indonézia

Cinco Do Oriente Uza Múzika No Kilat Reziste Hasoru Okupasaun Indonézia

1319
0
Banda Muzika 5 de Oriente

By Nuno R. Chaylor

Luis Vartan, artista husi Portugal ne’ebé hala’o serbisu militár iha Timor-Portugés, louva Cinco do Oriente nu’udar banda múzika ho reunifikasaun harmonica riku no furak liu kompara ho Kama Sura, Académicos/Bia-Luli, Lords, Fire Birds, Pedra Negra no Trap Pop Band Music Inc durante kolonizasaun.

La’ós de’it artista Luis Vartan mak gava Cinco do Oriente. Iha Agostu 1974, bainhira rona Cinco do Oriente toka iha festa conselho, eventu kulturál tinan-tinan, Clube Desportiva Baucau, turista ida husi Australia hakfodak tebes ho kualidade múzika husi banda ne’e. Australianu hakfodak no nakonu ho surpreza, hanesan hetan udan boot iha bailoron naruk. Nia la imajina, iha illa-rohan ne’ebé izoladu, dook husi influénsia múzika rock husi Europa no Amerika, bele rona-haree kualidade múzika Cinco do Oriente. Riku iha armonia ne’ebé fresku. Múzika sira ne’ebé nia rona de’it ho tilun, ohinloron bele haree no rona rasik.

Hakfodak ho kualidade múzika no ninian aprezentasaun, turista ne’e, la hanoin naruk tan, oferese kontratu fulan nen ba Cinco do Oriente atu toka iha Australia.

Ba Australianu, banda múzika ne’e sei sai makina osan ba nia. Ba Cinco do Oriente, oportunidade atu introduz nia múzika hakat liu tasi Timor. No toka iha Australia sei hamorin Cinco do Oriente no Timor-Portugés nia naran. Hakarak seluk ne’ebé bele espresa maibé labele realiza iha Timor mak ho toka iha Australia ba dahuluk Cinco do Oriente bele iha gravasaun rasik. Dezeju boot ne’ebé nu’udar mehi de’it tanba iha kapitál kolonia, Díli, laiha stúdio ba gravasaun. Hakarak iha gravasaun tenke hala’o iha Portugal ou fatin seluk. Australia sai oportunidade atu bele realiza mehi ne’e.  Maibé infelizmente, kontratu ne’e la konsege realiza tanba Indonézia lansa uluk ona kampaña destabilizasaun polítika atu loke dalan ba invazaun.

Cinco do Oriente nu’udar banda múzika ida, maske laiha album ne’ebé fó-sai, maibé nia naran kontinua morin no nia knananuk sira ema sei hananu to’o ohin loron. Naran morin Cinco do Oriente la’ós tanba de’it toka no kanta di’ak, maibé mós tanba nia membru hotu-hotu durante okupasaun Indonézia, uza múzika hamoris babeibeik espíritu luta ba ukun rasik an no iha tempu hanesan lori mós kilat hodi defende revolusaun maubere hasoru invazaun no okupasaun militár Indonézia.

Ba Cinco do Oriente, kilat no múzika, hanesan sorin rua husi moeda ida. Sorin rua ne’ebé inseparadu. Sira rua mós la enfrakeza ida ba ida seluk maibé fó kbiit liután ba malu. Husi elementu rua ne’e, halo nia knananuk sira supera espasu no tempu.

Ema hananu nafatin nia múzika sira to’o ohinloron tanba konsidera Cinco do Orienta nu’udar lejenda múzika timoroan sira nian.   Cinco do Oriente nia múzika la’ós de’it diverte maibé mós atu reziste. Múzika nia folin hanesan mós uza kilat tiru malu hasoru okupasaun. Ita la haree nia isin, maibé nia ai-han ba klamar nian.

Nu’udar provínsia, haree husi distánsia, Timor Portugés jeografikamente dook liu husi metropole no husi dezenvolvimentu sosial no ekonómiku atrazadu liu kompara ho kolónia sira Portugés nian iha Áfrika. Hafoin Segunda Guerra Mundiál mak autoridade portugés liuhusi Plano de Fomento hahú rekonstroe kolónia husi ruína devastasaun, kauza uza Timor-Portugés nu’udar fatin batalla entre Japaun ho Australia.  Governu portugés komesa haluan liután asesu edukasaun ba Timoroan sira no harii infraestrutura prinsipál hafoin Segunda Guerra Mundiál. Husi parte arte kulturál, iha 1950 nia laran, administrasaun koloniál hahú harii grupu rekriativu, desportivas no kulturál. Husi atividade sira ne’e mak hamosu banda múzika sira, poeta, aprezentasaun teatru, koru no klube desportu sira.

Foin iha dekada 1970, banda múzika Timoroan dahuluk ida husi sira seluk, Blue Star moris. Maibé Blue Star nia iis la naruk. Blue Star disolvidu iha 1971 tanba falta aparallajen. Durante disolusaun Blue Star, nia membru fahe malu. Filomeno Alves ba toka hamutuk banda múzika Académicos, Bobito no Manecas iha Lords.

Ho disolusaun Blue Star, Hermenegildo Alves halibur fali Filomeno Alves, Bobito no Cornelio Exposto ‘Manecas’ funda Cinco do Oriente iha 1972. Cinco do Oriente hahú funda no toka ho instrumentu múzika impresta husi nia kolega sira. Cinco do Oriente harii ho nia membru Filomeno Alves (solista), Manecas (viola ritmu), Alito (baterista), Hermenegildo Alves (baixu) no Babito (organista).  Hafoin Hermenegildo ba Lisboa, Manecas ba fali viola-baixu no Bobito ba fali viola ritmu no Toto Lebre iha 1973 sai organista.  Ho progresu ne’ebé hetan hafoin fundasaun, membru Cinco do Oriente aumenta, tama fali Bader no Zé Diogo (portugés) no feto vokalista na’in-rua Milu Brides no Domingas.  Maibé ikusmai Milu husik kanta no Domingas hetan serbisu nu’udar monitora eskolár hanorin iha interior.

Ho aparallajen imprestadu, kalan-kalan Cinco do Oriente treinu toka iha Audian, iha Filomeno Alves nia uma. Laiha fatin propriu atu treinu. Varanda uma-oin nian mak fatin ba ensaiu toka no hananu.  Ho aparellu múzika nia lian dada viziñu sira hodi mai haree, halo ensaiu iha varanda oin sai espetákulu ida tan ema barak mai halibur atu buka divertimentu, maske tenke la’o ain ho distansia dook.  Rona ema toka no hananu ho konjuntu nu’udar esperiénsia foun no buat luxu tebes iha tempu ne’eba.

La fasil atu hetan instrumentu múzika atu sosa, maske iha osan, laiha loja iha Díli ne’ebé faan sasan ne’ebé la’ós konsumu ema barak ona. Aparallajen tenke hameno diretamente husi Singapora no hein ró Musi to’o iha Díli atu ba foti.  Biar nune’e, falta ekipamentu la hamate Cinco do Oriente nia vontade toka. Membru Cinco do Oriente fiar katak bainhira iha vontade, sei iha dalan.  Toto Lebre haktuir katak bainhira drum laiha, Cinco do Oriente uza kaixote hodi toka. Nia lian sei la hanesan, maibé sei fó lian no ritmu ba múzika.

To’o 1975, iha Timor Portugés, televizaun seidauk eziste, sa tan internet. Liafuan no imajen a televisão   lee no haree de’it husi surat-tahan eskola nian. Fizikamente nunka haree televizaun nia oin. Nune’e mós ho revista.  Tuir Filomeno Alves iha nia entrevista iha A Voz de Timor hateten katak laiha revista múzika ruma ne’ebé sira bele lee hodi hatene tuir genre múzika sira no bele halo tuir jeitu tokadór sira nian. 

Cinco do Oriente aprende toka liuhusi rona radio no vinil (piringan hitam) ne’ebé susar tebes atu hetan. Laiha ema barak mak iha disku vinil hodi rona múzika. Husi membru Cinco do Oriente, Manecas nia aman de’it mak iha tanba serbisu iha alfadega.  Husi nia aman nia vinil, Cinco do Oriente rona no toka tuir hamutuk. Maske rona ona múzika husi vinil, maibé dalabarak susar tebes atu hetan nia letra.  Múzika rock barak liu iha ingles, la’ós portugés: “Ami kanta tuir de’it buat ne’ebé ami rona, naran katak hasara hanesan, maske dalaruma halai ses tiha husi nia orijinál,” Toto Lebre haktuir.

Biar nunka hetan revista múzika no haree televizaun, maibé tuir Toto Lebre: “Ami-nia jeitu toka hanesan de’it ho rocker sira iha Europa. Cinco do Oriente nia membru sira tau viola iha kotuk no ulun leten mak toka, hanesan mós rocker Europa sira-nian.  Sa tan ami haree menina bonita sira, ami toka haluha an tiha ona,” Toto Lebre konta ho hamnasa.

Nu’udar kolónia Portugés, Timor-Leste iha vantajen ida atu bele akompaña ho lais dezenvolvimentu múzika iha Europa no America, tanba portugés sira lori múzika sira ne’ebé rona iha Portugal mai nia provínsia.  Cinco do Oriente hetan influénsia makas husi banda rock koñesidu iha mundu husi Europa no Estadus Unidus: Led Zeppelin, Deep Purple, The Beatles, Santana, Walker, Rolling Stone, Grank Funk, Creedence Clearwater Revival (CCR), Jimmy Cliff no The Guess Who.

Biar la haree no lee banda rock osidentál toka, maibé genre múzika rock ne’ebé rona husi radio no aparellu vinil no gravadór lori influénsia boot ba Cinco do Oriente. Ninia influénsia la’ós de’it ba múzika maibé rocker osidentál nian sai mós idolu ba Timoroan oan sira. Nu’udar ezemplu, naran Xanana influensiadu husi knananuk Shalala-Lala husi banda rock Dinamarka, Walker. Múzika ne’ebé ikusmai jerasaun milenia hatene liuhusi banda múzika Venga Boys.

Sai foin-sa’e asimilado husi inan aman ne’ebé nia moris estabelesidu ona iha Dili, espasu kulturál ne’ebé administrasaun portugés kria sai asesivel.

Espasu prinsipál ida ba toka mak festa. Festa nu’udar nu’udar fatin ba múziku sira atu hatudu an iha toka no kanta, maske tuir de’it ritmu dansa nian.  Cinco do Oriente toka iha festa iha múzika portugés no múzika rock iha ingles ho ritmu dansa nian, hanesan husi banda CCR ninian ne’ebé to’o ohinloron banda jerasaun milenia sira sei toka nafatin iha festa kazamentu ka loron aniversáriu ninian.

Espasu seluk atu haklean toka mak administrasaun portugés regularmente organiza kompetisaun Grande Premio da Cancão de Timor, Grande Noite de Radio, espetákulu iha Genáziu Eskolar Dili no dalaruma iha areia branca, festa konsellu kada tinan iha Timor laran tomak ne’ebé fó biban ba konjuntu sira atu toka.

Aleinde múzika, administrasaun portugés regularmente halo aprezentasaun filme, deklamasaun poezia, koru no teatru ba públiku.

Maske ekipamentu no asesu ba aprezentasaun limitada, tanba la’ós ema hotu-hotu bele partisipa, maibé husi organizasaun no kualidade aprezentasaun konsidera aas tebes iha tempu ne’eba.  Iha espetákulu ida aprezenta teatru Aquele que diz sim husi Bertolt Brecht. Ne’e hatudu katak la’ós de’it múzika mak tuir progresu husi osidentál maibé, forma arte sira seluk mós Timoroan akompaña nafatin pensamentu intelektuál mundiál ninian ne’ebé fó influénsia ba sira-nia obra.

Artista sira ne’ebé atu toka ka halo deklamasaun iha espetákulu nia obra tenke hetan autorizasaun liuhusi dalan manan kompetisaun ou publika tiha ona. Porezemplu organizadór espetákulu konvida poeta Inacio Moura tanba nia obra publika tiha ona iha A Voz de Timor. Signifika, iha mekanismu atu sukat kualidade obra arte molok ninian aprezentasaun ba públiku.

Cinco do Oriente nia naran sai koñesidu liután bainhira manan kompetisaun Primeira Grande Noite de Radio iha 1972. Iha kompetisaun ne’e, Cinco do Oriente kanta múzika American Woman husi banda Kanada, The Guess Who no Vietnam husi Jimmy Cliff.  Atu tuir kompetisaun Grande Prêmio da Cancão de Timor, Cinco do Oriente halo ensaiu durante fulan ida ho seriedade membru tomak ninian.

Kompetisaun muzikál hala’o ho rigorozu tebetebes tanba tenke toka no hananu múzika orijinál ne’ebé avalia husi ekipa juri. Membru ekipa juri hotu-hotu portugéz. Múzika ida sei sukat husi harmonizasaun, interpretasaun, orijinalidade, letra no muzikalidade.

Iha Grande Prêmio da Cancão de Timor ne’ebé hala’o iha 1974, ne’ebé Antonio Augusto no Francisco Rodrigues ho nia múzika Vamos Unidos mak manan-na’in, Cinco do Oriente sai banda ne’ebé toka akompaña kompetisaun muzikál. Cinco do Oriente akompaña kompetisaun muzikál tanba manan tiha ona antes, nu’udar forma rekoñesimentu ida.

Cinco do Oriente hetan osan liuhusi tuir kompetisaun no toka iha konsellu sira ne’ebé konvida husi administrasaun portugeza.   Husi kompetisaun Grande Prêmio da Cancão de Timor, Cinco do Oriente manan 6 mil escudos. Bainhira toka iha festa konsellu ne’ebé organiza husi administrasaun portugés, Cinco do Oriente hetan osan 30-50 mil escudos ba kada konsertu. Osan ne’e uza hodi sosa fali instrumentu múzika, hanesan amplifikadór no viola.

Cinco do Oriente nu’udar banda múzika dahuluk iha Timor ne’ebé toka konjuntu kompletu iha misa, iha Igreja Motael desde 1974. Bainhira toka iha ba Igreja, Cinco do Oriente la husu atu selu alias gratuita.

Iha loron ida, iha festa konsellu iha Oecusse iha agustu 1973, Cinco do Oriente buka dalan atu la fila ho barikasa husi rai atoni ba Díli. Filomeno Alves hakarak lori ekipa tomak atu haree Indonézia, liuhusi Kefamenanu no Atambua. Tanba ne’e membru Cinco do Oriente finji lakon barikasa ne’ebé atu mai Díli.  Ho esforsu membru nian, PIDE autoriza membru Cinco do Oriente bele fila mai Díli liuhusi terreste. Ho osan 50 mil escudos ne’ebé hetan husi toka iha Oecusse, uza aluga karreta pick up ho tula ekipamentu no membru tomak mai hela loron balu iha Kefamenanu no Atambua.

Iha fatin rua ne’e, Cinco do Oriente toka iha fatin barak, inklui iha komemorasaun independénsia, 17 agustu no iha festa kazamentu. Cinco do Oriente tama sai uma hodi introduz sira-nia múzika. Cinco do Oriente nia toka adiantadu liu kompara ho banda múzika sira iha Kefamenanu no Atambua.

Iha festa kazamentu ida, molok toka, tempu han nian, membru tomak hamriik iha filleira atu ba han. Iha filleira laran, bainhira haree kopu mutin ho likidu kór hanesan tintu no viñu branku iha meza han nian, membru ida-ida bisi-bisi ba malu atu hemu loos ida ne’ebé? Membru balu dehan ha’u-nian tintu de’it, ida fali dehan viñu branku de’it. Maibé depois de hemu, sira foin deskobre katak buat ne’ebé sira hemu la’ós viñu branku ka tintu maibé xa no kafé. Sira hotu hamnasa, foin konsiente katak ida ne’e la’ós festa Timor Portugés nian, maibé festa iha nasaun viziñu ho kultura diferente.  Husi ne’e, Cinco do Oriente foin koñese kopi susu.

Hafoin Revolução dos Cravos, Cinco do Oriente toka ba FRETILIN, maioria membru banda ne’e sai militante no balu sai membru Komite Sentral Fretilin.  Iha kampaña FRETILIN, Cinco do Oriente sempre toka Foho Ramelau no múzika revolusionáriu sira seluk.  Cinco do Oriente toka iha iha Programa Radio Maubere, toka vivu ho múzika Foho Ramelau, Suruboek ho orientasaun husi Afonso Redentor.

Durante funu sivíl entre UDT no Fretilin, tan maioria família Toto Lebre nu’udar membru UDT, nia hetan kastigu. Maibé bainhira atu halo gravasaun ba Hinu Nasionál, Patria Patria, membru Cinco do Oriente seluk ba hasai Toto Lebre atu toka Hinu Nasionál ba gravasaun iha 6 dezembru 1975, iha sede Komite Sentral, ohin loron nu’udar Kuartél Jerál PNTL, Kaikoli. Depoisde gravasaun hatama fali Toto Lebre ba kadeia.

Cesar Maulaka nu’udar maun ba Toto Lebre hasai nia alin husi kadeia no evakua hotu ba ai-laran. Membru Cinco do Oriente hotu-hotu halai ba ai-laran iha parte Fronteira Norte, iha Ermera. Hermenegildo Alves asume kargu vise Ministru Defeza.  Alito no Manekas iha Fatubessi, Toto Lebre iha Maubara. Membru Cinco do Oriente sai eskoltu ba Hermenegildo Alves.

Iha situasaun funu, fofoun troka instrumentu múzika ho kilat. Maibé, hafoin Konferénsia Komite Sentral iha 1976, membru Cinco do Oriente ne’ebé fahe malu kontinua toka iha ida-ida nia fatin. Iha Maubara, Toto Lebre diriji koru kanta ho som 1, 2 no 3 hodi hatudu iha konvíviu.

Toto Lebre, Babito no Filomeno Alves muda hodi tuir Hermenegildo Alves mai Barique hamutuk iha Departamentu Defeza Nasionál (DDN). Husi ne’e, sira na’in-tolu kontinua halo múzika revolusionáriu sira no toka hamutuk iha konvíviu sira. Filomeno Alves halo múzika 7 dezembru no 20 agustu. Iha ai-laran ho viola kabokinu no harmonica (organ uza anin) ne’ebé foti husi Igreja Soibada lori hodi toka iha ai-laran. Toto Lebre foin ba dahuluk hetan akordiaun ho kualidade númeru 1 iha ai-laran husi nia kamarada Alfredo no uza halo múzika. Bainhira membru 5 do Oriente toka, sira toka to’o dadersan. Se viola tali kotu, foti tali kabu-de-asu husi bisikleta nian.

Ho operasaun Serku no Anikilamentu ne’ebé lansa husi militár Indonézia iha 1977 la fó biban ona atu atividade produsaun, edukasaun no kulturál bele la’o.  Ema ida-idak konsentra atu satan inimigu nia asaltu. Membru Cinco do Oriente tuir orientasaun husi Komite Sentral Fretilin atu tun mai vila.

Iha 1979, Filomeno Alves, Babito, Toto Lebre, Alito, Manecas forma fali banda múzika foun ho naran Vacum Melody. Grupu ne’e maske la toka ona múzika polítiku nian, maibé hakarak atu hatudu katak sira nafatin eziste. Iha festa ida, membru na’in-haat hakarak hatudu katak timoroan bele toka di’ak liu, maibé ikusmai tanba sira-nia partisipasaun polítika, Filomeno Alves, militár Indonézia lori lakon, tuir fali Alito no Manekas. Babito bele moris tanba halai ba Australia. Toto Lebre hetan salvasaun tanba kaben ho Abilio Osorio nia feton.

Cinco do Oriente halo múzika 5-6, maibé la konsege grava, tanba durante tempu portugés laiha studio atu halo gravasaun ba múzika.  Maibé, nia múzika Maria, Agostinho Moniz konsege grava iha Australia distribui iha Timor durante tempu okupasaun Indonézia. Cinco do Oriente nia múzika ne’ebé produz iha ai-laran grava iha 2013 ho aransemen husi Toto Lebre ho apoiu husi Comite 12 Novembro.

Cinco do Oriente nu’udar banda múzika sei nurak tebes no iha prosesu atu dezenvolve an no iha mehi  atu halo Cinco do Oriente koñesidu la’ós de’it iha Timor, maibé mós iha mundu, maibé invazaun Indonézia hamate nia kresimentu. Iha entrevista ho A Voz de Timor, iha 13 Setembru 1974, Filomeno Alves hateten: “O nosso maior desejo seria dar um espectaculo em Lisboa.” Ne’e hatudu katak, hafoin perkore ona Timor laran tomak, Cinco do Oriente hakarak tan lori nia múzika ba mundu, hanesan ho inisiativa no osan rasik introduz nia múzika iha Kefamenanu no Atambua. Mehi ne’ebé la konsege realiza tanba laiha patrosinadór iha kolónia ne’ebé konsidera atrazadu liuhusi kolónia portugés iha Afrika.

Biar nune’e, Cinco do Oriente bele konsidera nu’udar pioneiru múzika rock iha Timor-Leste. Cinco do Oriente hatene oinsá uza múzika ba rezisténsia no hatene pozisiona nia an iha tarefa boot luta libertasaun nasionál, la’ós de’it nu’udar lalenok ne’ebé fó-sai realidade sosiál, maibé senti nu’udar parte husi povu oprimidu no hamutuk ho povu oprimidu luta ba libertasaun nasionál.  Cinco do Oriente sai mós protagonista ne’ebé hatene uza múzika no kilat atu manán luta. (SKS).

Nota: Artikel memoria ida ne’e publika tiha ona iha Revista Presidensia da Republika nian

Print Friendly, PDF & Email

LEAVE A REPLY

Please enter your comment!
Please enter your name here