Home Memoria Neon Metin: Memoria Luta Informasaun Resistensia

Neon Metin: Memoria Luta Informasaun Resistensia

322
0

Neon Metin: Memoria Luta Informasaun Resistensia
By Carlos S.L.F.R ‘Saky’

Neon Metin, primeiru Boletin klandestina, harii iha tinan 1988. Harii hosi Resistência Nacional dos Estudantes de Timor-Leste (RENETIL) ho objetivu hodi denunsia krimi hotu-hotu nebe Indonezia halo hasoru Timor oan sira, nune’e mos hodi neutraliza propaganda falsu sira Indonezia halo iha forum internasional sira katak povu Timor-Leste simu ona integrasaun, laiha funu no violasaun ba direitus umanus iha Timor no povu kontente ona ho dezenvolvimentu. Seluk ho hirak ne’e, hodi konsiensializa Timor oan sira iha nebe de’it, hodi kontinua luta ba libertasaun Timor-Leste nian no hodi fahe informasaun kona-ba akontesimentu sira iha rezistensia armada, diplomatika no klandestina.

Neon Metin hakerek iha dalen Portugues. Opsaun ba dalen Portugues hodi  marka diferensa ho Indonezia no permite mos ba komunidade internasional hodi tuir akontesimentu sira iha rai-laran no rai-li’ur, no hahalok aat sira Indonezia nian hasoru Timor oan sira.

Neon Metin kuinesidu iha guerrilheiros sira nia leet no iha importansia boot ba Frente Armada. Liu hosi Neon Metin sira bele hatene akontesimentu sira iha rai-laran, iha rai-li’ur no iha Indonezia rasik. Nune’e mos Neon Metin sempre sai defensor ba politika no estratejia sira hosi Comando Superior da Luta (CSL) nian.

Komandantes barak, inkluindu Komandante Xanana Gusmão, sempre sani Neon Metin. Iha 20 de Agosto 1990, Xanana rekuinese no admira ba kapasidade analize no observasaun hosi Neon Metin nian (DRT 07153.048).

Importansia Neon Metin ba  Rezistensia Armada hanesan deskreve hosi Dr. Rui Maria de Araujo iha lansamentu livru RENETIL nian iha 2015. Iha 1994, Rui Maria ba ai-laran atu halo tratamentu mediku ba Komandante David Alex. Tuir Rui Maria, hetan malu foufoun, nia haree David Alex nia matan hanesan deskonfia nia no guarda-kosta sira ho kilat AR-15 hatudu ba nia. Maibe bainhira nia aprezenta-an nudar membru RENETIL nomos ema nebe uluk hakerek iha Neon Metin, halo Komandante David Alex admira no muda kedas nia postura, no guarda-kosta sira hotu hatun sira nia kilat. Komandante David dehan ba Dr. Rui Maria: “Eu leio sempre o Neon Metin” katak hau sempre sani Neon Metin.

Neon Metin, biar hakerek no jere hosi estudante sira deskuinesidu, maibe periodika ne’e hetan kredibilidade internasional ruma.  Iha 1990, notisia balun nebe publika iha Neon Metin, la’os sita de’it hosi akademiku balun iha Portugal maibe hetan mos publikasaun iha jornal Público Portugal nian, nebe ninia leitor sira hamutuk rihun.

Jornalista sira Neon Metin nian, mesak ema deskuinesidu, laiha naran no laiha esperiensia. Laiha esperiensia tanba sira nunka hetan formasaun kona-ba jornalizmu nian, sira aprende no hakerek hamutuk ho luta. Uniku Lucas da Costa mak iha kuinesimentu uituan kona-ba jornalizmu tanba nia hakerek iha jornal kampus UNDIKNAS nian, maibe nia hola parte iha Neon Metin iha ona 1989 ka 1990. Laiha esperiensia ne’e, bele nota hosi edisaun rua dahuluk nebe publika iha 1988 no 1989. Iha edisaun rua ne’e, bolu de’it Boletim de Infomação, ninia layout simples tebes, laiha logo tipu, koluna, rubrika, nein ficha técnica. Ninia aparensia lahanesan Boletin, maibe hanesan testu baibain ida.

Foin iha edisaun datoluk  mak mai ho naran Neon Metin no iha logo tipo. Adopta naran Neon Metin tanba hakarak transmite esperansa, fo fiar no laran metin ba Timor oan sira katak Timor-Leste sei manan funu no sei hetan ninia ukun-rasik-an.

Logo tipo hanesan imajen de marka ida nebe hatudu liman ida kaer tocha ka obor. Tocha nebe lakan hela halo ho au nebe futu hamutuk ho mapa Timor iha kotuk. Logo ne’e inspira hosi Timor oan sira nia moris no kultura, bainhira la’o kalan sira sunu au hodi leno dalan, ka sunu au hodi hanaroman fatin nebe sira halibur ba hodi pratika sira nia lisan no ritus. Kesak nebe futu hamutuk signifika hametin unidade entre Timor oan sira hodi halo rezistensia hasoru okupasaun Indonezia. Ahi lakan simboliza ispiritu funu nian la mate no kontinua lakan no manas nafatin.

Iha edisaun dahat, iha numeru 1 tinan 1990 nian, Neon Metin sofre mudansa maka’as. Iha ninia logo tipo, akresenta tan lia-fuan Loro-Sa’e hodi refere ba mapa Timor no iha fitun ida ho ninian raius nebe simboliza hatudu dalan no lori naroman ba povu no rai Timor. Alein de mudansa iha logo tipu, hahu hosi edisaun dahat, Neon Metin ninia layout no pajinasaun tuir ona regras nebe aprova hosi publikasaun sira jornalistiku nian. Iha rubrika sira fiksu hanesan Editorial, Carta da Redação, Ficha Técnica, Frente Armada, Frente Política Clandestina, Frente Política Diplomática, Eles e Nós, O Que Dizem de Nós no O Que Dizemos de Nós. Dala ruma iha Suplementu ka Edisaun Espesial nebe publika entrevista ka mensajen sira hosi CSL nian.

Iha Ficha Técnica aprezentra Neon Metin nudar Propriedade RENETIL nian, iha ninia Responsavel Prinsipal ba Administrasaun, iha Xefe Redasaun, membru Redasaun Ezekutivus, Editores, Distribuidores no Korrespondentes.

Biar hanesan media klandestina ida, Neon Metin tau ninia korrespondentes iha Europa, Afrika, Amerika, Azia, Oceania, Java no Timor-Leste. Nune’e mos iha distribuidores  iha rai-li’ur, rai-laran no Indonezia.

Foto sira nebe publika iha Neon Metin kona-ba Frente Armada ka kona-ba violasaun ba direitus umanos, baibain hasai hosi guerrilheiro sira rasik depois haruka ba Neon Metin. Material funu, aktividade militar sira Indonezia nian no foto sira kona-ba violasaun direitus umanus, baibain, aktivista klandestina sira mak hasai subar ka foti na’uk hosi arkivu militar no polisia sia Indonezia nian.

Nudar periodika klandestina, fatin redasaun no produsaun Neon Metin nian la fiksu iha fatin ida. Publikasaun dala ruma halo iha Jakarta, Malang no Surabaya, maibe dala barak liu halo iha Denpasar. Mudansa fatin ba mai sira ne’e tanba razaun rua, ida hodi evita deteta hosi inimigu no seluk depende ba Xefe Redasaun nia hela fatin.

Primeiro Xefe Redasaun Neon Metin mak Lucas da Costa, depois substitui hosi Rui Maria de Araujo, no ikus mai fila fali ba Lucas da Costa to’o Timor livre hosi Indonezia.

Iha Ficha Técnica, hatudu pessoal Neon Metin ida-idak ho ninia responsabilidade, maibe iha pratika, dala barak halo serbisu iha ekipa hodi garante susesu organizasaun nian.

Neon Metin sirkula iha rai-laran no rai-li’ur. Iha rai-laran Neon Metin sirkula iha Frente Klandestina no Frente Armada. Iha rai-li’ur Neon Metin sirkula iha rai sira hanesan Australia, Portugal, Brazil, Angola, Mosambike, Estados Unidos da Amerika. Iha Indonezia Neon Metin sirkula iha Bali no Java, iha sidades nebe estudante Timor oan sira estuda ba.

Nudar periodika klandestina nian, la determina fulan ida publika dala hira. Publikasaun depende ba situasaun no materia nebe iha. Iha periodu ida, durante tinan 3, labele halo publikasaun tanba perseguisaun no prizaun ba kuadru sira RENETIL nian, liuliu hafoin masakre Santa-Kruz iha 1991. Lahalo publikasaun iha periodu naruk ne’e hodi kumpri mos estratejia RENETIL nian nebe bolu hibernização. Adopsaun estratejia ne’e hodi fo mensajen no impresaun ba Indonezia katak RENETIL mate tiha ona, la ativu ona, inkluindu Neon Metin. Maibe klandestinamente RENETIL la mate, ativu nafatin, maibe hein biban oportunu hodi halo asaun nebe ho impaktu boot. Asaun ne’e mak hanesan akontese iha Novembru 1994, iha nebe membru RENETIL sira ho susesu okupa embaixada Amerika nian iha Jakarta no produz impaktu boot ba problema Timor nian. Impaktu boot tanba hetan kobertura direkta hosi jornalistas rai-liur sira hamutuk 2.000 no dada atensaun maka’as ba xefe Estado no Governu barak nebe partisipa iha Simeira APEC iha Bogor. Hafoin ne’e, Neon Metin mos mosu hikas iha tinan 1995. Kontinua halo publikasaun iha 1996. Iha 1997 to’o 1999, la halo publikasaun tanba RENETIL konsentra barak liu iha asaun sira iha Indonezia no media Indonezia no internasional barak mos hahu halo kobertura maka’as ba problema Timor nian.

La fasil hakerek no halo publikasaun ba Neon Metin, tanba jornalista sira mesak laiha esperiensia, la domina ka lahatene Portugues. Maibe espiritu luta nian no espiritu ekipa nian halo jornalista sira Neon Metin nian sempre hakat liu difikuldade sira. Sira nebe la hatene Portugues, hakerek notisia ka artigu sira iha dalen Tetun ka Indonezia depois traduz ba portugues. Balun hakerek iha portugues ida dezenraskadu, depois sira nebe hatene Portugues hadia. Editor sira nia serbisu la’os de’it hadia kontiudu artigu no notisia maibe hadia ninia estrutura, halo koreksaun ba portugues no sst.

Jornalista sira Neon Metin nian, jeralmente serbisu iha kalan hodi evita deteta hosi ema Indonezia ho ninia ajente sekretu sira ka estudante Timor oan sira nebe la’os membru RENETIL.

Neon Metin hakerek ho makina liman (mesin ketik), tanba iha tempu neba seidauk iha komputador. Ikus mai, iha tinan 90 resin, iha ona komputador, maibe RENETIL laiha osan hodi sosa.

Iha ona tinan 1990, Neon Metin foin hetan dezenvovimentu maka’as. Titulu rubrika ho notisia sira, inkluindu naran Neon Metin, uza ona rugos (huruf gosok). Serbisu ho rugos la fasil, tanba tenki taka letra ida-idak. Rugos mak tipu letra sira nebe hetan iha plastiku.

Serbisu boot no todan halo produsaun ba Neon Metin. Tanba hakerek ho makina liman, serbisu ida kolen tebes. Foufoun, molok hatama surat tahan ba makina, tenki kola uluk foto iha surat tahan, depois hakerek. Maibe, dalan ne’e, la’os de’it kole liu, maibe mos la efisiente no dala ruma estraga foto. Tanba bainhira hakerek sala, tenki hasai fali foto no kola fali ba surat tahan foun no hakerek foun tomak. Ikus mai, atu evita labele estraga foto, husik hela espasu ba foto, hakerek hotu ona foin kola foto ba surat tahan, depois halo kopia.

Neon Metin nudar periodika klandestina nian. Ninia distribuisaun sira la’os haruka liu hosi korreiu, lori hosi liman ba liman. Baibain RENETIL hasai Boletin orijinal ezemplar ida, depois Departamento de Agitação e Propaganda Política (AGIPRO) halo kopia barak hodi haruka mai Timor no fahe iha Rejiaun ka UNER sira RENETIL nian hetan ba. Ezemplar orijinal, haruka ba Australia ka Portugal, depois distribuidor iha Australia ka iha Portugal halo kopia hodi haruka tutan ba rai sira nebe distribuidor sira Neon Metin nian hela ba. Mai Timor-Leste, baibain, RENETIL haruka ninia membru ida lori Neon Metin hosi Indonezia mai Timor, entrega ba distribuidor iha Timor, depois nia halo kopia hodi fahe ba Frente Klandestina no Frente Armada iha ai-laran. Distribuisaun iha Indonezia mos hanesan. Ba rai-li’ur nian, jeralmente RENETIL haruka liu hosi Timor oan ka turista sira nebe halo vizita mai Denpasar ka Jakarta.

Lafasil halo kopias ba Neon Metin, tanba foto sira mai hosi guerrilheiros sira, barak mak fuk naruk ka foto sira violasaun ba direitus humanos hanesan torturas no oho ema, dada atensaun ba ema sira iha fotokopia fatin. Tan ne’e, bainhira ba halo foto kopia la’os de’it membru balu hosi Departamento de Informação e Segurança tenki akompaina no fo seguransa, maibe membru AGIPRO sira tenki prepara razaun hodi esplika ka lohi ema sira halo kopia bainhira sira husu. Sira nebe halo kopia presiza mental forte no brani, tanba hasoru risku boot. Ema bele kaer sira iha fotokopia fatin.

Neon Metin nudar aparellu ideolojiku RENETIL nian no megafone hosi asaun luta nian hodi hasoru Indonezia. Ninia misaun nudar mensajeiru, lori notisia kona-ba Timor ba Timor no ba mundu. Neon Metin sai hanesan motivador, insentivador, mobilizador, enkorajador no sai hanesan vitamina ida hodi alivia sofrimentu luta na’in sira nian hodi kontinua luta ba libertasaun Patria no libertasaun Povu. Ohin Neon Metin moris hias hodi kontinua luta ba libertasaun Povu.

 

 

 

 

 

LEAVE A REPLY

Please enter your comment!
Please enter your name here