Reportajen David da Costa Gusmao
Governu Australia liu husi Department of Foreign Affairs and Trade (DFAT), servisu hamutuk ho Fundus Nasoins Unidas ba Labarik (UNICEF_sigla Inglés), ohin entrega karreta hamutuk 21 ba Ministériu Saúde (MS) atu mellora servisu saúde nian iha Timor-Leste.
Reprezentativu UNICEF Timor-Leste, Bilal Durrani hateten karreta sira ne’ebé ohin entrega ne’e sosa uza fundus husi DFAT Australia nian, karreta hamutuk 21, karreta Toyota Hilux 13 hodi apoia imunizasaun no maternidade, bebé foin moris no programa saude labarik ba munisipiu 13.
“Karreta Toyota Hilux 2 ba program imunizasaun sira iha nasional no SAMES, I.P no Toyota Hilux 1 ho kaixa ferramentu ba Departamentu Biomedikal nivel nasional, hodi apoia vasina no distribuisaun produtu sira relasiona ho saude, formasaun, supervizaun no monitorizasaun,” dehan Reprezentativu UNICEF Timor-Leste, Bilal Durrani, iha Salaun Palaciu da Cinzas, Kaikoli, 19/10.
Karreta truck Box Mitsubishi 5 hodi apoia armazein servisu saúde rejionál/munisipálál kona-ba distribuisaun produtu farmaseutiku husi servisu saude municipál ba fasilidade sentru saúde sira.
“Provizaun infraestrutura mak iha ne’e kritiku tebes, espesialmente agora, desde ke Ministeriu Saude halo hela esforsu atu atinji ema barak ho vasinasaun Covid-19,” haktuir Bilal Durrani.
Nia salienta ho fundus husi Governu Australia, sei apoia MS nia programa imunizasaun, departamentu biomedical no SAMES, I.P, ba programa monitorizasaun no supervizaun inklui vasinasaun Covid-19.
Iha fatin hanesan Ministra Saúde, Odete Maria Freitas Belo hatete, ho apoiu sira ne’e fiar katak Ministeriu Saude bele atinje lalais porsentu ba vasinasaun nian no mellora servisu saúde nian iha Timor-Leste.
“Ohin ita hetan tan apoiu transporte balun husi Governu Australia ne’ebé oferese ba ita liu husi UNICEF, no transporte sira ne’e sei fo ba iha fasilidades sira iha munisipiu sira hodi asegura vasinasaun ba iha fatin ne’ebé mak ita identifika tiha ona, nune’e sira la bele iha tan razaun katak transporte mak la iha,” nia dehan.
Enkuantu transporte sira ne’e sei oferese ba iha fasilidades sira iha Munisipiu 13, hodi transporta vasina ba iha komunidade sira.
