Presidente Banku Dezenvolvimentu Asiatiku ka Asian Development Bank (ADB), Masato Kanda husu ba Ministra Finansas Santina Jose Rodrigues Ferreira kona ba Projetu Aeroportu Presidente Nicolao Lobato, , iha enkontru bilateral iha loron dahuluk Enkontru Annual Banku Dezenvolvimentu Asiatiku, iha Milan, Italia, ohin (03/05).
“ADB husu kona ba projetu aerportu nian hanusa ona? ADB koopera ona ho Ministeriu Komunikasaun halo ona revizaun ba projetu ne’e hodi alinha fali ho prioridade tanba uluk iha tiha ona estudu hatama ba akordu no asina tiha ona antes, maibe iha komponente balun mak governo halo revizaun tan ne’e hasai fali hosi akordu antes nian”, Ministra Santina haktuir.
“Apresia mos ba ADB ba sira nia flexibilidade hodi fo opurtunidade adjusta projetu tuir nesesidade governo nian mesmu iha alterasaun prioridade, maibe sira nafatin kolabora”, Ministra Santina hato’o ba ADB nia Presidente Kanda.
Fulan hirak liuba, Ministru Komunikasaun no Transporte, Miguel Manetelu ba RTTL hatete katak Timor-Leste la presija aerportu hanesan Sydney ka Melbourne maibe presija mak aerportu ida naton hodi fasilita aviaun tama-sai no tuir padrau ICAO nian.
Observador ida ba projetu ne’e, Mesias Soares hato’o katak, “los duni Timor-Leste la presija aerportu luxu maibe tenke iha qualidade”.
Projetu Hadiak Liutan Aeroportu Presidente Nicolao Lobato nia komponentu infraestrutura mak atu halo extensaun ba pista ne’ebé agora iha to’o 2,100m, halo luan estrada dalan aviaun husi 30m too 45m no aumenta aviaun nia dalan strip protesaun komesa 150m too 280m. Halo mos konstrusaun foun ba Taxiways no parallel sorin balun ba taxiways.
Projetu ne’e fo impaktu ba rai no propriedade sira seluk ba ema lokál sira. Resultado avaliasaun ADB nian ba sasan afetado sira finalize iha Janeiro 2022 no resulta katak iha familia uma kain 248, kompania nian 2 (rua) ho eskola primaria nebe hetan afeitado husi projeto.
