“La tempu ona atu taka eskola maibé tenke hadi’a eskola sira atu nune’e fasilita povu nia oan hodi asesu ba edukasaun”. Elderito
Relasiona ho desizaun husi Mistériu Juventude no Desportu (MEJD), atu halo suspensaun ba ensinu aprendizajen Ensinu SekundáriaTékniku Vokasionál (ESTV) 3 ESTV Railaka, ESTV Calbale ESTV Reman Bote iha munisípiu Ermera, nune’e Uniaun Estudante Universitáriu Munisípiu Ermera (UNEUMER) la konkorda ba desizaun refere.
Liuhusi konferénsia imprensa Porta-vóz Zaqueu Maia de Araújo haktuir, eskola tolu ne’ebé eziste sai alternativu, hodi solusiona estudante ne’ebé hela iha area rurál no laiha kbiit atu asesu ba eskola hirak ne’ebé sentráliza iha kapitál munisípiu.
“ESTV Railaka maka sentru ida hodi fasilita estudante sira iha suku estadu, goulolo, eraulo, lauala-leten, Humboe, Raimerehi no riheu, ESTV Calbale Lauana fasilita estudante iha suku lauana, boboe leten, leimea no ESTV Reman-Bote fasilita estudante suku Lasaun, Batuamau, Obulo, Atara inklui Hauba” dehan Zaqueu liuhusi Komunikadu Imprensa iha Jardín 5 de Maio(02/02).
Nia rekomenda ba MEJD no Sosiedade-sivil hodi tau prioridade hodi mellora fasilidade, rekursu relevante inklui rekezitu sira ne’ebé sei menus, hodi eskola ne’e bele fasilita povu nia oan sira ne’ebé susar atu asesu ba eskola sira iha villa-munisípiu nian.
Iha Fatin hanesan Prezidente UNEUMER Elderito Salsinha hateten, preokupasaun ba polémika ne’e la’ós estudante nian de’it, maibé kauza komún maka komunidade tomak iha munisípiu Ermera, tan karik preokupasaun ne’e maka laiha solusaun, maka sei hato’o karta formál direta ba parte relevante atu hala’o audénsia hodi solusiona.
“Ami mós simu ona informasaun husi Diretór Edukasaun Munisípiu Ermera Eduardo Martins nia laiha desizaun kona-ba ida ne’e, maibé desizaun ne’e husi MEJD rasik” Elderito klarifika iha komunikadu imprensa.
Nia fundamenta, la tempu ona atu taka eskola maibé tenke hadi’a eskola sira atu nune’e fasilita povu nia oan hodi asesu ba edukasaun ho di’ak no iha indepedensia tinan 20 resin ne’e presiza hadiak liu tan kualidade edukasaun iha teritório nasionál, espesiálmente eskola tolu ne’ebé mak atu hetan suspende husi governu.
