Reportajen Santina Lucia da Costa
Xefe Estadu Major General FALINTIL –FDTL, Tenente General Lere Anan Timur hasoru malu ho Prezidente Republika Dr. Francisco Guterres Lu Olo, hodi kolia kona-ba situasaun rai laran no prosesu rekrutamentu militar foun.
Hafoin enkontru ba jornalista sira Xefe Estadu Major General FALINTIL–FDTL, Tenente General Lere Anan Timur informa prosesu selesaun teste ba kadetes foun militár sira la’o daudaun, liu-liu ba teste fíziku, no saúde, depois sei lori loron 40 hodi fó sai rezultadu se maka liu no la liu.
“Situasaun forsas armadas ninian, situasaun rai laran hau informa liuliu kona-ba rekrutamentu ne’ebe agora hala’o dadaun, iha rekrutamentu ne’e, prosesu hala’o selesaun teste fiziku, saude, ne’e sei lori 40 dias fo rezultadu se mak liu no se mak la liu. Agora hahu ona hosi Munisipiu dili, depois hotu sei ba fali munisipiu seluk,” informa Xefe Estadu Major General FALINTIL –FDTL, iha Palasiu Prezidensial Nicolau-Lobato, Bairu-Pite,loron, 9/6.
Tenente General Lere Anan Timur hateten situasaun rai laran, situasaun kalma, foin daudaun membru polisia tiru mate komunidade nain rua ne’e krime, tuir lei se maka oho ema ne’e krime,
Lere dehan kona-ba rekrutamentu Prezidente Repúblika konkorda prosesu ne’ebe maka F-FDTL halo ne’e, fó prioridade ba jerasaun patriota sira, maibe la signifika sira ne’e izentu ba kritériu sira ne’ebe maka komisaun rekrutamentu hatuur, liu-liu saude ida ne’e importante liu.
