Reportajen Umbelina dos Reis
Ohin loron 01 setembru, Universidade da Paz (UNPAZ), realiza konferensia imprensa hodi dirije ba IX Governu konstitusionál ligadu ho desizaun politika infantil ne’ebe produz iha Parlamentu Nasional nu’udar segundu orgaun soberania ba deputadu sira ne’ebe representante povu iha uma fukun Parlamentu Nasional.
Portavoz Teo Salsinha, liuhosi konferensia imprensa ne’e hateten, universidade da paz afirma pozisaun hodi kontra no la konkorda total ho desisaun politika infantil no prematur husi deputadu sira iha uma fukun Parlamentu Nasional ne’ebé hakarak sosa viatura foun 65 ho marka PRADO sei utiliza orsamento jeral estadu (OJE), ho montante $ 4.2 miliaun, nune’e mak universidade da paz konsidera desizaun politika ne’ebé Parlamentu Nasional deside ne’e la nesesariu. Razaun La presiza atu sosa tan kareta luxu ba deputadu sira, tanba kareta ne’ebe dadaun ne’e deputadu sira utiliza ho kondisaun sei permite hela, no laiha indikasaun ruma katak kareta ne’e avaria ona.
” Deputadu sira hetan tiha ona kareta ho marka prado iklui laptop MAC no mos direitu ba rejalias oioin hanesan, subsidiu ba alojamentu, subsidiu ba tratamentu, subsidiu ba eletrisidade. Nune’e deputadu labele gastu arbiru orsamentu jeral estadu (OJE), hodi fo previleziu ba deputado sira, tanba kultura aat ida ne’e la fo benefisiu ba povu, maibé investe ba iha setor produtivo sira ne’ebe bele fo rendimentu ba estadu inklui kria kampu traballu ba joven timor oan sira, tanba iha dadus timor-leste iha dezempregu pursento 5,1% inklui mal nutrisaun aas 47,1%. tanba ne’e universidade da paz afirma la nesesariu atu sosa karreta ba deputado sira.” Dehan portavoz Teo Salsinha ba jornalista sira liuhosi konferensia imprensa, iha Resintu Campus UNPAZ, segunda-feira, 01/09.
Nia dehan, Universidade da paz husu ba Parlamentu Nasional atu uza orsamentu ne’ebe iha hodi halo dezemvolvimentu ba infraestrutura bazika hanesan estrada bee mos inklui eletrisidade ba suku no aldeia sira ne’ebe seidauk asesu. Tanba Universidade da paz konsidera sidera desizaun politika ne’ebe Parlamentu Nasional deside nu’udar aktu korrupsaun legal, tanba sira rasik halo lei, no sira rasik aprova hodi uza osan povu nian ba sira nia intrese privadu.
“Bazeía ba preokupasaun sira ne’e estudante Universidade da Paz rekomenda ba PM Kay Rala Xanana Gusmao nu’ udar xefe Governu presiza kaer prinsipiu interdependensi institusional fo atensaun ba Parlamentu Nasional imediatamente kansela desizaun sosa prado ba deputadu sira. Nune’e mos husu ba Presidente Parlamento Nasional no deputado sira atu resolve uluk kondisaun no situasaun real povu nian antes deside imi nia interese ne’ebe demasiadu tebe-tebes, no husu ba PN atu hapara kultura sosa, tanba la’os kareta mak sai razaun ba deputadu sira nia funsionamentu. Hatudu responsabilidade los nu’udar representante povu iha uma fukun Parlamentu Nasional.” Nia informa.
