Reportajen Joselina dos Santos
Governu Japaun liuhosi Embaixadór Japaun iha Timor-Leste entrega kareta Bombeirus tolu, mak hanesan kareta ki’ik rua no kareta boot ida ba govern liuhosi Autoridade Protesaun Sivíl (APC), hodi nune’e bele suporta membru Bombeiru sira nia operasaun diak liu tan, hodi kombate situasaun inséndiu ne’ebé akontese iha rai laran kualkér tempu.
Sekretáriu Estadu Protesaun Sivíl (SEPS), Joaquim Jose Gusmão dos Reis Martins hatete, Embaixadór Japaun entrega tan kareta Bombeiru tolu pontus korru rubanu rua, pontus korru mediu ida, tanba iha Suai dadaun ne’e iha ona atividade mina nian iha ne’ebá. tanba ne’e kareta ida sei apoiu iha Suai, hodi bele prontu ba akontesementu ruma. Nune’e mós kareta ida sei fó apoiu ba munisipiu Baucau, tanba laiha kareta Bombeirus ne’ebé mak adekuadu atu sira uza hodi bele hatan ba serbisu.
“Maski governu Japaun apoiu ona ekipamentus hirak ne’e, maibé seidauk sufisiente, ohin ha’u dada lia ho embaixadór no aproveita tempu atu husu apoiu ba iha Governu Japaun, liu-liu iha área hasa’e kapasidade ba iha ita nia rekursu umanu iha ne’e, no Japaun sai hanesan nasaun ida ne’ebé esperiénsia boot atu bele suporta ita,” dehan Joaquim Jose Gusmão dos Reis Martins hafóin serimónia entrega ekipamentu iha edifisiu APS Kaikoli, tersa 21/02.
Iha fatin hanesan Embaixadór Japaun Tettuya Kimura salienta, ohin sira atende serimónia entrega Bombeiros tolu ba povu Timor-Leste, ida ne’e ba komunidade nia seguransa hodi bele proteje sira nia aan, ne’e hanesan prezente ida husi Governu Japaun ba Povu Timor-Leste hodi kombate Insediu ne’ebé akontese iha Timor-Leste.
“Iha pasadu ami suporta ona kareta Bombeiros lima, ne’ebé dadaun ne’e sei halo operasaun ba 13 Munisipiu Inklui RAEOA, ohin ami fó tan kareta tolu ba Protesaun Sivil hodi bele suporta sira nia operasaun diak liu tan, nune’e mós ami iha treinamentu online hodi kapasita membru sira hodi hala’o sira nia servisu ho diak hodi kombate kualkér situasaun iha Timor,” nia esplika.
Nia salienta, iha fulan Abril Japaun mós halo treinamentu online ba manutensaun nian ba membru sira, atu bele hatene oinsa uza kareta Bombeirus ne’e, no uza iha tempu ne’ebé naruk.
