Reportazen David da Costa Gusmao*
Governu Xina liu hosi nia Embaxada iha Timor-Leste, entrega maskra hamutuk 40,000 ba Ministeriu Administrasaun Estatal (MAE), hodi oferese ba komunidade iha Munisipiu Covalima, atu bele uza hodi proteje-an husi Pandemia COVID-19.
Embaixador Xina iha Timor-Leste, Xião Jianguo’s hateten ohin embaxada Xina fo maskra hamutuk 40,000 ba Munisipiu Covalima liu husi Ministeriu Administrasaun Estatal, espera katak bele halo buat ruma ne’ebe mak importante, atu bele halo prevensaun hosi COVID-19 iha Timor-Leste.
“Pedidu ida ne’e husu husi Ministeriu Administrasaun Estatal (MAE), mai iha embaxada Xina, no iha tempu badak nia laran ami resposta kedas ba iha ajuda ne’e,” esplika Embaixador Xião Jianguo’s ba jornalista sira iha Embaxada China, Pantai Kelapa, 04/03.
Iha fatin hanesan Vise Ministru Administrasaun Estatal, Lino de Jesus do Rosario hateten Xina iha interese duni atu ajuda no ema sira iha Covalima mos interesadu atu simu apoiu prevensaun hosi COVID-19.
“Moras Transmisaun lokal ba COVID-19 ne’e importa husi Indonezia mak mai, ita tenki eduka ita nia komunidade sira atu uza masker, fase liman bebeik no tenki kumpri regra husi Organizasaun Mundial Saude (OMS) nian,” nia esplika.
Nia haktuir hahu aban ba oin, planeia ona atu transporta maskra sira ne’e ba Covalima, maibe iha deit Kondutor ho nia ajudante ida mak sei hodi sasan ne’e ba Covalima.
Entertantu Administrador Interinu Munisipiu Covalima, Francisco de Andrade agradese tebes ba govenu Xina, tanba iha tempu hanesan ne’e ema hakarak ajuda ne’e signifika ema hadomi Timor, nune’e iha situasaun ida hanesan ne’e populasaun Covalima bele hetan apoiu Maskra husi embaxada Xina.
“Apoiu sira ne’ebe mak embaixada Xina fo ami sei hodi liu ba iha ami nia munisipiu Covalima, hodi fahe ba komunidade sira iha Covalima atu bele uza,” nia konklui.
*(David da Costa Gusmao nudar estudante UNTL ne’ebe halo estajiu iha Neon Metin)
