Home Notisia Inundasaun, Aliança nia Produtu Iha Laclubar Hetan Estragus, Fo Impaktu Ba ...

Inundasaun, Aliança nia Produtu Iha Laclubar Hetan Estragus, Fo Impaktu Ba Rendimentu

557
0
Aliança Soares hosi Aldeia Amanun, Suku Manelima Laclubar. [Foto: Adroaldo | 27.05.2021]

Reportajen Adroaldo ‘Saretukau’

Dezastre Natural ne’ebé akontese iha 4 Abril, fo impaktu boot no estraga komunidade Aldeia Amanun, Suku Manelima, Postu Administrativu Laclubar sira nia plantasaun hanesan ai-horis no ai-fuan hotu,  ne’ebé sira kuda hodi sustenta sira nia família ba han no faan iha merku

Jornalista Neon Metin hakat ba komunidade afetadu sira nia hela fatin, hodi hatene besik situasaun ne’ebe sira hasoru, hanesan labele asesu estrada, no sasan ne’ebe sira faan ladun iha folin hanesan iha situasaun normal.

Komunidade Aliança Soares hosi Aldeia Amanun, Suku Manelima haktuir akontesimentu inunduasaun no rai monu, fo impaktu ba produsaun iha toos, no produtu ne’ebe faan la hetan folin

“Ami ba iha merkadu, sasan ne’ebé folin ami bele simu netik osan ruma, balu ne’ebé la folin ami nia maluk sira iha vila, ami bele fo hela ba sira, ami labele lori fila-fali mai tanba todan” hateten komunidade Aliança ba Neon Metin iha Manalima Antiga, 20/05.

Aliança haktuir nia triste tebes tanba produtu hotu ne’ebé sira tau neon hodi ba fa’an iha merkadu hetan estragus hotu durante inundasaun ne’ebé akontese.

“Ami iha ne’e fa’an tali malae, ami silu kabura ba fa’an, ami bele fa’an ai-fuan sira hanesan talas, ai-farina, fehuk, hudi buat seluk la iha. Maibé ai-fuan sira ne’e estraga hotu, ba iha to’os laran ami la tau buat ruma ba ami nia bote laran”, haktuir Aliança ho triste.

Nia haktuir mos katak bai-bain sira hala’o viajen ba merkadu iha dadersan madrugada, maibé oras ne’e ho estrada nia kondisaun ne’ebé ladun di’ak, difikulta tebes sira ba merkadu, “depois ami la’o rai sei nakukun ba merkadu, ami bele monu tanba estrada aat”.

Komunidade Aldeia Amanun ne’e husu ba governu atu hadi’a estrada diresaun ba sira nia knua, atu nune’e sira bele halo movimentu ba mai ho di’ak, liu-liu sira bele asesu ba merkadu hodi transporta sira nia produtu lokal hanesan bai-bain.

“Ami hakarak Manelima moris fali, ami hakarak hadi’a estrada para ami hodi moris di’ak, se Manelima mate, ami reinu mos mate hotu, se estadu trata ami entaun ami moris di’ak, se lae ami moris la di’ak, tanba buat hotu liu hosi estrada hodi ami bele la’o, tanba kareta mos la’o ladi’ak, motor mos ladi’ak, ami atu halo nusa, ami fila-liman karik ba Manatuto ne’ebá liu hosi kareta, kareta la iha ami moris ladi’ak”, hateten Aliança.

Iha parte sorin Xefe Suku Manelima Jorge Soares via telefone ba Neon Metin hateten katak, hafoin dezastre estraga komunidade sira nia uma no mos plantasaun, ho nune’e problema tebes ba komunidade ni-nia moris.

“Komunidade sira hasoru problema iha inundasaun afeita ba uma, parte ida mos afeita ba to’os no plantasaun sira. Ida afeta ba uma mais ou menus estadu hori-bain hirak ne’e apoiu netik hanesan sasan emerjénsia ba sira, mais liga fali ba to’os no plantasaun sira la hetan buat ida, ne’ebé ita haree ba mai sira ne’e hasoru hela problema boot ida,” hateten Xefe Suku Manelima Jorge.

Lider komunitáriu ne’e hateten tuir arrolamentu iha nia suku, komunidade sira ne’ebé hala’o atividade negósiu iha merkadu tantu iha Postu Laklubar to’o iha Díli, barak liu ho produtu tua Sabu, tuir fali mak kafé nomos ba ai-fuan sira hanesan fehuk, talas, ai-farina no ai-fuan sira seluk, maibé oras ne’e sira nia asesu ba merkadu la hanesan antes dezastre.

“Sira ba nafatin merkadu maibé lahanesan uluk ne’ebé sira seidauk hasoru dezastre ne’e, tanba hanesan ba ai-fuan sira ne’e, balu rai halai, rai taka, ne’e sira lakon total tiha. Ida fali halai ba tua sabu, tua sabu ne’e iha Laclubar maioria balu ko’a, balu ba fa’an, entaun ida tua hun ne’e mak rai halai, rai taka tomak tiha sira nia tua, sira la halo ona (tu’a na’in la ko’a ona)”, hateten Jorge.

Iha parte seluk konabá estrada Xefe Suku informa katak, oras ne’e estrada iha kondisaun di’ak tanba nia hamutuk ho komunidade sira hadi’a tuir sira nia kbiit, hodi transporta apoiu emerjénsia tama ba Suku Manelima. Maibé tuir observasaun Neon Metin iha terenu notak katak, estrada hosi Manelima antiga (Manelima lama) ba Postu Laclubar grave tebes, susar ba ema no transporte tradisional Kuda atu liu, tanba ne’e komunidade sira liu de’it hosi dalan korta ki’ik, nune’e difikulta tebes sira asesu ba merkadu komunitáriu iha postu Laclubar.

Enkuantu merkadu komunitáriu iha Postu Adminisrativu Laclubar kada semana dala rua mak Domingu ho Kinta. Hosi Suku Maneliman rasik komunidade sira atu to’o ba merkadu refere kuaze oras ida no balu oras ida liu.

Print Friendly, PDF & Email

LEAVE A REPLY

Please enter your comment!
Please enter your name here