Reportajen Filomena da Conceicao
Sentru Saúde Osso-Queli, Postu Administrativu Vemase, Munisípiu Baucau Enfrenta Problema Sala Maternidade ba inan isin, tanba ne’e maka halo atendeimentu ba inan isin rua la duun diak.
Xefe Sentru Saúde Osso-Queli, Flabiano da Piedade verdial, hateten, daudaun ne’e, sentru Saúde Osso-Queli, postu administrativu Vemase, Munisípiu Baucau enfrenta Problema Sala Maternidade ba inan isin rua, tanba laiha sala ba maternidade ketak ba inan isin rua no bainhira partus hamutuk deit ho paseinte sira seluk.
“Sentru Saúde ida ne’e sei hetan, problema ba fasilidade sira, atu atende Inan isin rua tanba ita oberva pasiente baibain ho inan isin rua sira iha fatin ida de’it, tanba ne’e mak dalaruma atu halo atendeimentu ne’e la duun di’ak” dehan Xefe sentru Saúde Osso-Queli Flabiano Piedade Verdial ba Jornalista sira Iha Sentru saúde Osso-Queli, vemase Baucau, Tersa, 21/11
Nia haktuir, sira hakarak iha uma maternidade ketak atu nune’e bele atende inan isin rua sira ho bebe sira atu nune’e bele hetan tratamentu ho di’ak no seguru tanba durante ne’e inan isin rua sira uza hamutuk sala ho pasiente baibain sira.
Tanba ne’e, relasiona ho problema hirak ne’e, sentru saúde Osso-Queli hato’o ona ba Ministériu da Saúde maibé to’o agora seidauk iha resposta ruma ba problema refere.
Aliende ne’e, moras ne’ebé dadaun ne’e registu makaas iha sentru Saúde Osso-Queli maka moras, diareia, dengue no mear.
“Ko’alia kona-ba moras, dadaun ne’e tempu udan, tanba ne’e mak sentru saude ida ne’e registu moras diareia, dengue no mear maka barak liu, no liuhusi moras hirak ne’e fasil tebes atu hamate labarik sira nia vida” Dehan Xefe sentru Saúde Osso-Queli.
Entretantu, Sentru saúde Osso-Queli iha kama partus hamutuk rua, no totál rekursu Umanus hamutuk 11 kompostu husi médiku, enfremeiru no parteira, nune’e mós hetan apoiu maximu husi internatu sira ne’ebé hetan kontratu husi Ministériu Saúde.
