Reportajen David da Costa
25anos ona Timor-Leste referendu, tanba ne’e, Providor Direitu Humanu no Justisa (PDHJ) husu ba partidu politiku sira, foka iha formasaun politika hodi eduka ninia kuadru politiu sira ne’ebé-ke komprende konseitu,kona-ba vizaun dezenvolvimentu nasaun ninia.
Providor Direitu Humanu i Justisa (PDHJ), Virgilio Da Silva Guterres “Lamukan” hato’o apresiasaun ba partidu politiku sira nian kontribuisaun ne’ebé maka halo ona hodi haburas demokrasia iha Timor-Leste.
“Ami mos hakrak enkorja partidu politiku sira, foka iha formasaun politika, hodi eduka ninia kuadru politiku sira ne’eb komprende no entende kona-ba konseitu, no entende kona-ba vizaun dezenvolvimento nasaun ninia. Atu nune’e bainhira sira kaer ukun, sira hatene interpreta vizaun sira nia partidu nian, ba iha konseitu estratejia dezenvolvimentu ninia,” dehan, Providor Direitu Umanu i Justisa, Virgilio Da Silva Guterres “Lamukan” liuhusi Konferensia Imprensa iha edifisiu PDHJ Kaikoli, Kinta 29/08.
Nune’e kaer ukun labele konsentra de’it atu tau interese sira nian partidu ninia, maibé tau interese povu ninia, povu asuwain, povu luta na’in ne’ebé-ke terus barak atu hetan indepedensia ida ne’e.
“Tanba ne’e 25 anos, hakarak atu fó hanoin liafuan husi As’wain Nicolao Lobato ninia, ne’ebé-ke hateten katak, ita sira be sei moris ne’e la’os de’it tanba ita nia eforsu atu sobrevive, maibé mós tanba iha maluk seluk ne’ebé hatene mate. Tanba sira mate maka ita moris, ohin komemora tinan XXV referendu ita hotu tenke refleta katak se ohin loron ita moris ita goja liberdade, tanba iha ema seluk ne’ebé maka hatene hili, i hili loos iha tinan XXV liu ba,” nia haktuir.
Tanba dezisaun autodeterminasaun ne’ebé maka povu maubere halo iha tinan XXV liu ba maka sai baze ka referensia ba ema hotu goja liberdade atu kaer ukun hodi halo ida-idak nia profisaun.