Reportajen Filomena da Conceicao & Umbelina dos Reis
Prezidente Steering Commitee Festival Fronteira Hugo Maria Fernandes hateten, preparasaun ba loron festival ne’ebé realiza iha suku Costa, Rejiaun Administrativu Espesiál Oekussi Ambeno (RAEOA) preparadu 90% ona, no aban bainaka sira to’o hotu ona mai iha ne’e.
“Nune’e espasu ba atividade refere prontu ona tanba horseik no ohin loron bainaka hosi Timor to’o uluk ona no aban bainaka hosi nasaun viziñu Indonézia to’o tan ona mai. Bainaka refere hosi munísipiu sanulu resin tolu ne’e reprezentante hosi joventude hosi Conselho Nacional Juventude Timor-Lorosa’e (CNJTL), Alumi Parlamentu Foinsa’e Timor-Leste (APFTL), no Rotary Youth Leadership Awards (RYLA). Hosi nasaun viziñu Indonézia mak Nusa Tengara Timur (NTT), Kupang, Kefa, Belu no Malaka,” Dehan Prezidente Steering Commitee, Hugo ba Neon Metin iha Oecuse RAEOA suku Costa, Sabado, 12/10.
Diretor Ezekutivu CNC, Hugo Fernandes. [Foto: Silvino | 12.10.2024]
Nia mos informa, reprezentante munisípiu governu lokal hosi Timor ne’e fronteira rua, alende Oecuse RAEOA nu’udar uma na’in, munisípiu Covalima no Bobonaro sira mai para halo dansa kulturais no partisipa iha feira refere, nune’e mak la konvida hosi autoridade munisípiu hotu-hotu, maibé hosi de’it fronteiras. Abertura ofisial ba loron festival iha 14/10/2024 kalan, no eventu ne’e sei loke hosi Primeiru Ministru Interinu Mariano Assanami Sabino. Eventu ne’e sei ensera iha loron 18/10/2024 kalan.
Iha Sorin seluk, Joven Leoverzildo husi bairo Oebau, Aldeia Asanani haktuir, hanesan joventude iha suku Costa sente kontente tanba Festival Fronteira ida ne’e, primeira vez realiza iha sira nia suku, maske nune’e festival ida ne’e laos ba Oekussi oan deit. Sente urgullu tanba bele mai halo animasaun hodi harame suku Costa, maibe iha parte seluk triste tanba preparasaun ba eventu festival la involve bairo nain.
“Iha parte seluk, hau triste oituan tanba preparasaun ba realizaun festival ida ne’e la involve ami joventude sira ne’ebe hela besik iha bairo ida ne’e. Nunee’e hau bele konsidera sira nia preparasaun ba realizaun festival ne’e, maibe sente sira la konsidera ami bairo nain. Ami bairo nain sai penonton ba sira nia preparasaun” dehan Leoverzildo ba Neon Metin.
Maske nune’e, nu’udar joven ka Timor-oan ida ne’ebe hela besik bairo ne’e prontu atu kontribui ba festival ida hodi bele realiza ho diak atu nune’e, ema husi rai liur ne’ebe tuir hela festival refere bele valoriza Timor nia nasaun iha rai seluk.
Nune’e mos, joven Celisia Olivia husi suku Costa haktuir, nu’udar bairo nain ba eventu Festival Fronteira ne’e sente triste tanba Komisaun organizadora ba eventu refere la konsidera bairo nain.
“Hanesan bairo nain, sente orgullu tanba linha Festival Fronteira ba tinan ida ne’e bele realiza iha ami nia bairo. Iha buat balun ne’ebe halo ami ladun satisfas sira mai realiza festival iha ami nia bairo maibe la konsidera ami bairo nain tanba durante preparasaum ba festival ne’e nunka komvida ami bairo nain,” dehan Cecilia.
Cecilia mos informa katak bairo nain mos hakarak atu hatudu atraksi ruma iha evetu ne’e maibe sente triste tanba laiha informasaun ruma ba bairo nain kona-ba ida ne’e.