Reportajen David da Costa
Iha Aniversáriu Masakre Santa Cruz ba dala 33, Prezidente Repúblika (PR) José Ramos-Horta apela ba foin-sa’e timoroan sira atu iniveste iha formasaun profisionál, teknika no akademika ne’ebé permite Timor-Leste atu partisipa tomak iha espasu rejional sira.
Prezidente Repúblika (PR) José Ramos-Horta, dehan, Timor-Leste nia integrasaun iha Asosiasaun Nasaun sira Sudeste Aziátiku nian (ASEAN) loke oportunidade oioin ba ita-nia rain, hahu hosi kooperasaun ekonómika no akadėmika to’o hametin lasu komersial no kultural sira.
No Ida ne’e hanesan momentu ida ne’ebé úniku, ne’ebé ezije Juventude sira atu prepara didi’ak ba dezafiu no oportunidade sira husi merkadu komún ho abitante liu millaun 700 (atus hitu) no PIB ida liu dolar triliun tolu.
“Ha’u apela ba foin-sa’e timoroan sira atu iriveste iha formasaun profisionál, teknika no akademika ne’ebé permite ita atu partisipa tomak iha espasu rejional ida-ne’e,” Prezidente Repúblika José Ramos-Horta, apela ba foinsa’e sira, Bainhira halo nia Diskursu iha aniversáriu loron Nasionál Juventude no Masakre Santa Cruz ba dala-33 iha Santa Cruz, Tersa 12/11.
Tanba ne’e, ho atensaun espesial ba área sira ekonomia verde no azul nian, Joven sira iha Timor-Leste bele kontribui ba dezenvolvimentu sustentável iha área agrikultura, peska, turizmu, no konservasaun ba Timor-Leste nian rekursu naturál sira.
Dezenvolve abilidade atu opera iha merkadu ida-ne’e ezije dedikasaun no vizaun ba futuru, no esensial atu garante katak Timor-Leste aproveita oportunidade empregu, investimentu no inovasaun foun.