Reportajen Filomena da Conceicao
komunidade Aldeia Leubasa, Suku Lauana, Postu Administrativu Lete-foho Munisípiu Ermera, Fransico da silva ho idade 55, iha inisiativa rasik hodi ke’e debu hodi Konserva bee ba komunidade uma kain 27.
“Be’e ne’e uluk desde avo nia tempu bé la iha inisiu Indonesia nia tempu rai ne’e halai tun ba bé ne’e mosu, mosu mai mos seidauk ke’e nalihun hela iha rai leten depois hau foti fali ai-suak hau ke’e tiha hotu hau hada depois bé ne’e mosu kontinua”, dehan Francisco da Silva iha bee matan”, dehan Francisco ba jornalista sira, iha bee matan Rai-hein, Leubasa, Suku Lauana Ermera, Kuarta 20/11.
Nia konta, bainhira debu ne’e seidauk iha, komunidade iha aldeia Leubasa uma kain sanolu ne’ebé pertense ba bee matan ne’e difisil tebes atu asesu ba bee, kuase la’o ain ho kilometru tolu foin hetan bee, maibe husi nia esforsu bele hakman ona komunidade Uma 27 nia preokupasaun kona-ba bee.
“Uluk pasadu liu ba ami kuru bee tesik liu ba hospital nia leten ne’e ba ohin eskola nia kraik nia tun ba ne’e to’o bee ne’e mosu ami uja hotu bee ne’e to tempu agora, hau nia esforsu maka bee ne’e to’o ohin loron kuase komunidade sira iha Aldeia ida ne’e utiliza hotu kuandu bailoron naruk, ami labele uja atu haris no fó hemu animal, ami so bele kuru hodi hemu deit no uja ba tein deit”, Nia Konta tuir tan.
Komunidade sira iha ne’e mos hetan apoiu husi grupu Permatil no Tilofe iha tinan 2021 fulan Maio banhira bee ne’e maran no konserva fila fali husi grupu Permatil no grupu Tilofe hodi ajuda fali konservasaun ba bee ne’e.
Iha fatin hanesan, Abrão Maia hanesan kordenador movimentu konservasaun Bee (MKB) Leubasa hanesan mos ekipa servisu Tilofe nia hateten, atividade konservasaun bee matan Rahein hetan apoiu orsamentu husi Permatil hodi aloka ba Tilofe atu konserva fila-fali be refere ne’ebé lokaliza ba iha uma lisan Bihahi konsumu husi uma kain hamutuk 27.
“Iha atividade konsarvasaun bee matan Rahein ne’e lokaliza ba iha uma lisan Behahi no uma kain 27 maka uja bee ida ne’e, atividade refere hetan apoiu orsamentu husi Permatil mai iha Tilofe no Tilofe maka tun ba hodi halo konservasaun iha ne’ebá, iha 2021 ita halo atividade konservasaun be matan Rahein ita hatene katak iha momentu bee matan rahein seidauk hetan konservasaun nia maran iha fulan Maio la to’o fulan Agostu antaun ho atividade konservasaun ita bele hamoris fila-fali bee matan ida ne’e agora nia komesa bo’ot fila-fali moris to’o udan monu rai mos nia la maran,” Abrão esplika.
No iha grupu Permatil no Tilofe ne’e mos esforsu ona ba debu Rahein atu labele maran, bainhira sira halo konservasaun kontinu kedas ho re-florestasaun atu halo prevensaun ba bee matan sira iha Leubasa labele maran iha tempu bailoron naruk, inklui sensilibiliza informasaun kona-bá komunidade sira maneira konservasaun ba bee.
Entretantu debu ne’e mosu iha tinan 1995 bainhira Fransico da silva ho idade 24 anos no esforsu ne’ebé nia kontinua halo ba bee matan to’o agora, nia kuda ai-bubur metan haleu bee matan sira atu nune’e debu labele maran iha tempu bailoron naruk.