Reportajen David da Costa
Tinan ida ne’e Timor-Leste sei halo’o Aniversáriu ba loron Proklamasaun Indepedénsia Timor-Leste nian ba dala-49, Eis Presidente Repúblika (PR) Jeneral Taur Matan Ruak, hala’o refleksaun hodi hanoin fali Pasadu, presente no futuru, tanba Pasadu Timor-Leste ukun-aan ne’e hodi ho ran no hodi ho terus, tanba ukun-aan ne’e la tau iha bandeija ida mak fó de’it mai.
Eis Presidente Repúblika (PR) Jeneral Taur Matan Ruak, hateten, Tinan ida ne’e kompleta tinan 49 anos, tinan oin kompleta 50 anos. husi tinan 1975 mai to’o iha ne’e, Timor-Leste iha istoria ida ne’ebe maka riku ho buat ne’ebe diak mas iha mos ho buat aat, sofrementu barak maka to’o iha ukun-aan ida-ne’e.
Tanba Timor-Leste atu ukun-aan ema la tau iha bandeija fó mak fó, maibé lori ruin ho ran no terus maka foin hetan ukun-aan aan ida ne’e. Tanba ne’e hadomi nasaun ne’e no hadomi povu ida ne’e tanba nasaun ne’e lori ema maka sosa.
“Ha’u nian mensajen ba povu Timor maka ida-ne’e, hadomi ita nia rai, hadomi ita nian povu, tanba ema la fó ita iha bandeija ita sosa, hodi terus maka ita hetan, buat ita lori osan maka sosa, ita nunka soe, ita nunka halo aat, ita kuidadu didiak tanba sa maka lori ema maka sosa ita la kuidadu,” dehan Eis Presidente Repúblika (PR) Jeneral Taur Matan Ruak, bainhira halo refleksaun loron 28 Novembru 2024, Pasadu, Presente no futuru iha Rezidensia Gabainete eis PR nian iha farol, Tersa 26/11.
Nia kontinua hato’o mensajen ba populasaun tomak maibelé liu-liu ba ukun nain sira agora kaer ukun, hahu husi Presidente Repúblika José Ramos-Horta, Presidente Parlamentu Nasionál, Primeiru Ministru, Presidente Tribunal Rekursu no governante iha Timor laran tomak no to’o iha xefe aldeia. Fatin ida sira agora tur ne’e, ema rihun ba rihun nia terus no sakrifisiu no sofrementu maka ohin loron sira tur iha sira nia fatin, tanba ne’e kuidadu, tuir nafatin sentimentu ne’ebe maka sira fó hela.
“Haluhan ita nia aan tau matan ba ema barak, tau matan ba ita nian nasaun, tanba ita nian interese iha buat tolu, interese individual, interese grupu, interese nasaun, kada iha nian fatin, iha ne’ebe deit nasaun hotu nian tenke iha ita nia leten, nia maka iha fali iha grupu ho interese individual nia okos, ida ne’e tinan ida refleksaun, tinan idake ita hanoin ita nia sofrementu, ita hateke ba oin katak, ita fiar objetivu ita nian rai, difini ba nia an, hametin estabilidade, pas no mos bens estar ita nian sidadaun sira nian, ne’e ita sei hetan loron ida ba loron ida. Lori tempu naruk, lori serbisu makaas ba sira sei manan,” dehan eis Presidente Repúblika.
“Parabéns ba povu Timor-Leste, halo aniversáriu Proklamasaun Indepedénsia Timor-Leste, i goloria eterna ba sira ne’ebe mate ona no sira ne’ebe lakon, hodi fó hela nasaun ne’e mai ita no rai ne’e ba ita,” Eis Presidente Repúblika Taur hato’o Parabéns ba povu Timor-Leste.
Eis Presidente Repúblika (PR), Jeneral Taur mos hato’o ninia manefesta ba familia sira iha Timor, iha ne’ebe deit tasi feto, tasi mane, rai ulun rai ikun ne’ebe maka lakon nia Inan ho Aman no família tomak ba harii nasaun ida ne’e.