Reportajen Ekipa Neon Metin
Presidente da Republika Jose Ramos Horta konvida duni Ketua Forum Komunikasi Pejuang Timor-Timur (FKPTT) no Eis-Wakil Panglima Milisi, Eurico Guterres, atu partisipa iha Seremonia Selebrasaun Loron Proklamasaun 28 Novembru, iha Oecusse-Ambeno, maibe Eurico la partisipa no Presidente Republik Indonesia, Prabowo Subianto, mos la partisipa.
Iha intervista ho Eurico Guterres, via Whatsapp call horiseik (26/11) Eurico hatete katak nia sei la mai partisipa iha seremonia 28 Novembru iha Oecusse – Ambeno ne’e.
“Ha’u respeitu sira nia konvite maibe tan deit tolok ema eroi sira hanesan ne’e, ne’ebe ha’u evita, ha’u sei la ba. Ha’u nia hanoin dehan hanesan ne’e, buat ida dia 28 Novembru ne’e, buat sakral boot ida, ba ema hotu nian, la haree dehan katak o maka terus, o maka susar, o maka kiak, ka o maka riku”, Eis-Wakil Panglima Milisi, Eurico Guterres esplika ba Neon Metin horiseik.
“Ha’u la’os tauk, mas tenke evita problema. Hau lakoi ita aumenta problema ne’e ba beibeik, hau evita ida ne’e”, Eurico aumenta iha nia esplikasaun.
Eurico mos hatete katak tenke tau akontesementu 28 Novembru ne’e, akontesementu Nasionál. Ne’e ba ema hotu-hotu, atu gosta ka la gosta ne’e ba ema hotu. ita labele claim dehan katak akontesementu 28 Novembru ne’e ha’u nia de’it laos sira nian, ida ne’e labele hanesan ne’e.
Rezaun seluk ne’ebe halo Eurico la partisipa mak prosesu judisiariu nian ne’ebe Eurico nia naran sei tama hela iha lista Krimi Seriu nian.
“Sira seluk bele ba hau maka sei tama iha lista no labele ba rai liur hanesan mos ba Timor-Leste”, Eurico esplika liutan.
Iha intervista ne’e Eurico mos fo informasaun katak Prezidente Indonesia, Prabowo Subianto sei lapartisipa iha tinan ida ne’e, maibe tinan oin Prabowo sei partisipa. Tinan ida-ne’e Prezidente Indonesia nia reprezentante maka sei ba, no Jeneral Wiranto mak sei partisipa iha ne’ebá.
Eurico esplika mos katak Prezidente Horta nia hanoin ho Primeiru Ministru nia hanoin dehan katak Jeneral Wiranto partisipa ona entaun Eurico mos partisipa para ita koalia ne’e dala ida.
Presidente Ramos Horta hakat Kupang hodi buka Eurico no husu diretamente atu Eurico partisipa iha selebrasaun loron Proklamasaun ba Independensia ne’e iha 8 Novembru liuba. Hamutuk ho Primeiru Ministru Xanana Gusmao, Prezidente Horta hakarak promove rekonsiliasaun ne’ebe tuir sira nudar susesu bo’ot Timor-Leste nian iha mundo.
