Reportajen David da Costa
Aniversáriu loron Proklamasaun Indepedénsia Timor-Leste ba dala-49, Primeiru-Ministru (PM), Kay Rala Xanana Gusmão, husu bá joven sira atu labele see tilun bá boatus oioin ne’ebé hafahe Timoroan nu’udár maun ho alin no husu atu haluha pasadu hodi hateke bá dezenvolvimentu nasaun no moris di’ak povu nian.
“Husu bá joven sira atu haluha tiha buat ne’ebé akontese iha pasadu hodi ita hamutuk iha armonia nia laran, bele hateke bá rai no povu ida-ne’e. Lalika see tilun bá lia-fuan oioin ne’ebé hakarak hafahe ita, tenke haree dook,” Dehan Primeiru-Ministru bainhira partisipa iha Aniversáriu loron 28 Novembru 2024, iha kampu Prizaun Becora ne’ebe maka Neon Metin Asesu husi Média-GPM, Kinta 28/11.
Xefe Governu ne’e mós sita katak, Prezidente Repúblika Indonézia, Prabowo Subianto delega ninia reprezentante hodi partisipa iha komemorasaun tinan ne’e, nune’e jenerál balun mós mai to’o Rejiaun Administrativa Espesiál Oecusse Ambeno (RAEOA) inklui bainaka espesiál balun hosi Malázia.
Xefe Governu konsidera ho prezensa bainaka importante sira ne’e hatudu katak ema sei fó konfiansa bá Timor-Leste.
“Ne’ebé, nu’udár rai ida hatene haluha buat hotu ne’ebé akontese iha tempu uluk nian hodi hahú kria armonia no amizade atu hotu-hotu ko’alia bá malu kona-bá oinsá dezenvolve rai no povu ida-ne’e nia moris,” hateten Xefe Governu.
Delegasaun Indonézia ne’ebé partisipa iha komemorasaun restaurasaun independénsia iha RAEOA mak hanesan Jenerál TNI, Wiranto hanesan mós atuál Konsilleiru Prezidensiál, Tenente Jenerál TNI, Yoedhi Swastono nu’udár asistente segundu, Adi Warman nu’udár asistente primeiru, Kolonél Infantária, A. Suryo no Teten Nugraha nu’udár ajudante asistente ho membru delegasaun sira seluk hamutuk na’in 12.