Reportajen Agustinha Amaral
Assosiasaun Jornalista Timor Lorosa’e (AJTL), kolabora ho The Asia Foundation hodi fo treibamentu ba jornalista sira konabá direitus umanus ne’ebé apar ho misaun no vizaun AJTL nian, oinsá promove liberdade imprensa no espresaun, parte fundamental husi AJTL nian haree husi direitus umanus.
Prezidente AJTL, Zevonia Vieira hatete katak jornalista hotu-hotu iha intelektualidade presiza iha prespektiva direitus umanus iha sira nia servisu, tanba jornalista rasik luta hela ba liberdade imprensa no espresaun liu husi kobertura no opiniaun ne’ebė maka hato’o iha espasu fíziku nomos espasu dijital.
“AJTL hakarak fahe ba nia membru sira atu hasa’e koñesimentu no komprende di’ak saida mak direitus umanus uainhira foti asuntu sosial liga ho feto no ema barak nia direitu liu husi kobertura no opiniaun ne’ebé la ses husi direitus umanus atu nune’e ajuda jornalista hanoin kritiku komprende lei sira ne’ebé karik estadu no governu sira ne’ebé iha poder ne’e viola ema sira nia direitu,” hateten Zevonia Vieira ba jornalista sira iha edifisiu FUKUPERS, sabadu 30/11.
Iha treinamentu ne’e ko’alia konabá oinsá halo kobertura konabá feto, buzu sexsual, ema ho difisiente nia direitu, ida ne’e mak sira sei aprende hamutuk.
“AJTL mehi no iha prisipiu ida hodi ajuda nia membru sira atu hasa’e koñesimentu kritiku atu nune’e direitus umanus ne’e la’o ho di’ak, hodi ajuda estadu atau respeita ema ida nia direitu iha moris, tanba kostituisaun RDTL hatete iha ne’eba oinsá direitus umanus sai prisipiu fundamental.”
Tanba iha nasaun barak, nasaun ditadura sira ne’ebé hetan kontrolu maka’as, ema lakon barak lakon sira nia direitu, sidadaun liu-liu jornalista sira barak hetan kaer, oho no hetan investigasaun, dehan Zevonia.
Nia esplika, treinanentu ida ne’e ajuda tebes jornalista sira atu komprende uainhira iha intimidasaun ga preokupasaun, hatene oinsá atu relata no proteje sira nia aan, oinsá prevene situasaun sira ne’e, labele sai vitima ba violasaun direitus umanus no labele akontese iha Timor.
Tinan oin AJTL hamutuk ho The Asia Foundation produz mata dalan direitus umanus ba jornalista sira atu lee oinsá matan dalan ne’e ajuda jornalista iha kobertura iha tereinu liu-liu ba asuntu feto, relijiaun, LGBTI no ema difisiente no mos kona ba lei sira atu ajuda komprende uainhira halo kobertura.
Husu konfirmasaun ba estadu ka governu oinsá atu hetan matadalan ikus husi projeitu ne’e, tinan oin final husi programa ne’e atu halo diskusaun kabuar ho instituisaun barak hanesan jornalista sira, akadémiku, sosiadade sivil no governu atu fo sira nia hanoin konaba importasia husi direitus umanus, direitu dijital iha Timor-Leste, oinsá jornalista sira kontribui hodi promove luta ba ema sidadaun sira nia direitu.