Reportajen Umbelina dos Reis
Selebra loron aniversariu Klibur Juventude Unidade Cairedo Oan (K-JUCO), ba dala – IX, K-JUCO hamutuk ho autoridade lokál, veteranu no komunidade suku Abo realiza Futsal cup iha aldeia Cairedo, suku Abo, postu administrativu Matebian, munísipiu Baucau. Objetivu hosi atividade ne’e atu halibur no hametin juventude sira hodi kria amizade entre suku ho suku no eskola báziku iha suku Abo, inklui animasaun ba festeza tinan foun 2025.
Prezidente komisaun organizador K-JUCO Cup, Francisco Fernandes Soares hateten, objetivu hosi atividade ne’e atu selebra loron moris K-JUCO nian ba dala-IX, nune’e membru grupu tur hamutuk fó hanoin ba malu katak selebra aniversariu Klibur nian planu realiza atividade desportu simples au mezmu festeza natal no tinan foun hamutuk ho inan-aman, joven, labarik ki’ik no ema ho defisiénsia (EhD).
“Ami nia grupu tau ideia hamutuk tinan ida ne’e ami realiza atividade tolu mak hanesan programa primeiru, jogu desportu futsal, segundu, diskursu públiku entre eskola ensinu báziku católika (EBC), no ensinu báziku filial (EBF), Abo Uaimatale no terseiru adisaun no animasaun ba alin ki’ik oan sira.” Dehan Prezidente Komisaun Organizador, Francisco Fernandes Soares ba Neon Metin, iha sabado, 21/12.
Nu’udar joven foinsa’e tenki iha espiritu voluntarizmu hodi kria pas, unidade, dame no domin iha sosiedade rural, hafoin kontinua ba iha nivel nasionál, tanba kria amizade ba juventude sira hosi entre suku ho suku ne’e importante. Mezmu hasoru dezafiu barak iha momentu realiza atividade hirak ne’e, maibé dezafiu sira ne’e la’os bareira hodi satan ami joven nia mehi ba futuru.
“Atividade ne’e realiza tanba hetan apoiu orsamentu hosi Timor Telecom (TT), montante $180 no apoiu hosi Nano Sports mak ekipamentus hanesan bola 2, arbitu 2, scor poin 1, rompi lusin ida no hetan mos apoiu ekipamentus hosi Ministeriu Juventude Desportu Arte Cultura (MJDAK), mak hanesan bola 2, farda lusin 2.” Nia informa.
Nia dehan, iha jogu refere, kada team ida rejistu ba jogu futsal ne’e ho $25 dólar. Team ne’ebé rejistu ona iha eventu K-JUCO cup mak hamutuk sanulu resin tolu (13) hanesan Squad Campu FC, Borlems FC, Wamata-bare FC, Batikasa FC, Putar FC, Jodame FC, Gorilla FC, Narkoda FC, Wai-bua FC, Bunalai FC, Dara-oma FC, Anelu FC no Atateu FC. Nia hatutan, jogu refere hahu abertura hosi loron 21 dezembru to’o 30, jogadores ne’ebé mak sai vencedor iha jogu ne’e primeiru lugar sei hetan taxa 1 no orsamentu montante $100 dólares Americanu, segundu lugar $75 dólares no terseiru lugar $50 dólares.
Oficial Gabriel João da Conceição informa, primeiru pesoalmente orgullu tanba bele partisipa iha jogu torneiu futsal K-JUCO Cup ne’ebé sira realiza iha suku Abo, aldeia Cairedo tanba liuhosi jogu ne’e joven sira bele koñese malu di’ak liu tan hodi hametin relasaun familia no kolega, mezmu postu de’it maibé joven sira jaran hetan malu tanba ida-idak hala’o nia moris iha sidadi Baucau no Dili. Nune’e to’o tempu loron bo’ot hanesan loron finadu no Natal ka tinan foun mak hotu-hotu foin mai halibur malu iha suku.
“Ami nia Club Batikasa preparadu ona atu partisipa iha jogu K-JUCO Cup ne’ebé realiza iha suku abo, aldeia Cairedo, hosi ami nia Club Batikasa hamutuk ema na’in sanulu resin rua (12) mak partisipa tanba tuir kriteria ne’ebé sira fó sai, nune’e ami mos rejistu $25 dólares hafoin jogu, signifika ami nia jogu ne’e hasoru malu entre Club ho club, maibé ami garanti sei sai manan iha jogu ne’e.” Dehan oficial Gabriel João da Conceição, ba Neon Metin.
Nia dehan, bainhira partisipa jogu ne’e manan ami orgullu tebes, maibé karik lakon mos nafatin agradese tanba jogu ne’e hanesan animasaun ba joven no foinsa’e inan-aman no labarik ki’ik oan sira hodi bele koiñese malu di’ak liu tan iha suku Abo.