Reportajen Adroaldo “Saretukau”
Associação Acadêmica Estudantil, Faculdade Medicina e Ciências da Saúde (AAE-FMCS) fo sai aktu irregularidade ne’ebe komete husi estrutura FMCS liu-liu Departamentu Escola Superior Tecnologia de Saúde (ESTeS).
Iha konferénsia imprensa, ne’ebé hala’o iha Kampus FMCS, Lahane, tersa (29/04), Porta-voz, Cancio Fernandes hatete, aktus ne’ebé komete ka irregularidade, sira hanesan, viola normas universidade, viola prinsípiu no valores ne’ebe UNTL opta, no iha estrutura balun aproveita nia pozisaun iha universidade hodi atinji nia interese pessoal, no grupu nia interese.
“Aproveita estudante foun ne’ebe suku farda hodi hetan osan, aktu ida ne’e sai ona tradisaun aat estrutura Departamentu ESTeS ne’ebe kada tinan prátika bei-beik, aktu ida ne’e komete husi Diretor Departamentu Eskola Superior Teknologia Saúde, Miguel Soares, iha ne’ebe diretor ne’e, obriga estudante sira atu sukat farda iha Alfaiate Felicia tanba tuir informasaun Diretor hetan subornu husi kompañia refere.” Dehan Cancio Fernandes.
Tuir tan mak “Diretor Departamentu Parteira, Rafael do Santos Ximenes, iha ne’ebe hasai estudante sira nia naran husi lista estajiu sem justa kauza no aplika sansaun disiplinar ba estudante la liu husi konsellu disiplinar.” Tenik nia.
Nune’e mos iha mal jestaun mak prátika husi Vise Dekanu Asuntu Estudantil, Acasio De Jesus, hanesan Presidente Komisaun ba praxe akadémika FMCS anu letivu 2025.
“Ami nota katak la ezekuta lolos osan orientasaun akademika nian nune’e resulta iha orientasaun akademika, kadeira ba estudante sira tur la iha, hahan ba komisaun organizadora la to’o, hola hahan la tuir presu ne’ebe sita iha Budget, la iha mos aimoruk ba primeiru sokoru no ikus falsifika lista KO praxe akademika anu letivu 2025.”
Porta-voz mos hato’o katak iha kobransa Ilegal akontese bei-beik. “Professor sira obriga estudante, entrega livru, transkrisaun valor $10 dolar, kobra estudante sira hola projector no hadi’a AC, maski universidade ne’e finansia husi Orsamentu Jeral Estadu.”
Hosi kazu hirak hirak ne’e, iha mos asediu sexual, iha Faculdade Medicina e Ciência de Saúde, maske universidade asina ona dokumentu zero asediu sexual iha kampus.
“Aktu ida ne’e hatudu momos katak manorin lakon ona nia moral, tanba aktu ida ne’e dosente sei nafatin prátika bainhira estudante sira bimbing KRS.”
Ho konferensia imprensa ida ne’e, jornalista sira husu atu konfirma ho Diretor Departamentu Eskola Superior Teknolojia Saúde, maibé diretor laiha fatin.