Reportajen Silvino Freitas
Ospitál Referral Maubisse infrenta hela makina Complete Blood Count (CBC) ne’ebé avaria durante fulan 3 ona, nune’e sira halo ona proposta ba nasionál atu bele hetan fali makina foun nune’e mos makina ne’ebé avaria dadaun ne’e iha ona nasionál atu halo manutensaun.
Diretor Executivu Ospitál Referal Maubisse Virgilio Mendonca dehan, ospitál referal Maubisse iha buat 5 ne’ebé importante maka orsamentu, medicamentu, edifisiu, rekursu-umanu no ekipamentu, nunee kona-ba rekursu umanu maski sira presiza nafatin maibe tanba ho kondisaun ospitál ne’ebé ki’ik maibé rekursu umanu sufisiente atu hala’o servisu atendimentu nian.
“Medikamentu sei tama estandar ne’ebé normál ami iha ne’e servisu ida bolu morning report kada loron kada unidade halo relatóriu pur eskrita mai iha hau nia meza para hau hatene problema saida, nune’e medikamentu sei tama hela estandar 6,2” dehan Diretór Executivu Virgilio Mendonca ba jornalista sira iha nia kna’ar fatin Ospitál Referal Maubisse, (11/08).
Nia dehan tan, haree fila fali ba ekipamentu hotu hotu iha hodi hala’o servisu maibe Complete Blood Count (CBC) makina hasai ran kompletu nian mak dadaun ne’e falla hela, nune’e sira relata ona ba nasionál no dadaun ne’e iha ona prosesu atu haruka fali ba ospitál referral Maubisse, nune’e makina ne’e mak dadaun ne’e infrenta hela problema iha ospitál referral Maubisse.
“Durante fulan 3 ona tanba sasan ne’e mos faan iha Timor Leste laiha no tenke sosa iha liur no ida at nee agora lori tun ona ba sira hadi’a hela” dehan Virgilio.
Nia dehan, pasiente ne’ebé presiza nesesariu ne’e hala’o atendimentu manual maskí presiza duni makina atu konfirma ema nia moras 100% maibé klinikamente hanorin ita katak 85% hanorin ona atu hatene ema nia moras, nune’e husi manual seluk mak hasai raan seluk hodi halo kalkulasaun ka iha rumus seluk atu hasai raan seluk enkuantu dezde ospitál infrenta makina avaria la demora pasiente nia moras tanba moras ne’ebé grave halo kedas transferensia ba ospitál nasionál iha Dili.
“Hein prosesu tanba sira sei hadi’a hela tanba tekniku sira atu hadi’a iha nasionál, iha ne’e bele haree maibé kompeténsia loloos iha nasionál liuliu iha laboratorio nasionál” hakotu Diretór Executivu Virgilio.
