Reportajen Joselina dos Santos
Lansamentu ba loron nasional liberdade Imprensa iha loron 16 Outubru, nu’udar mos loron trajédia Balibo Five, tanba iha jornalista nain 5 husi Australia no Nova Zelándia ne’ebe hetan oho militár Indonesia iha loron 16 Outubru 1975, iha Balibo.
Iha komemorasaun ne’e Prezidente Konsellu Imprensa, Virgilio da Silva Guterres “Lamukan” husu ba jornalista Timoroan sira atu mantein nafatin hala’o knaar hodi servi povu, maske iha kondisaun ne’ebe difisil maibe esforsu hodi kontinua luta ba liberdade imprensa no liberdade espresaun.
“Ita hamutuk iha fatin ida ne’e atu hahi no hanai jornalista Timor oan no Jornalista estranjeiru ne’ebe mate, no fó liberdade tomak atu determina ba ukun rasik-an, ohin loron ita hetan liberdade”, Dehan, Prezidente Konsellu Imprensa (KI), Vírgilio Guterres “Lamukan” iha selebrasaun Balibo Five, Postu-Administrativu Balibo, Munisipiu Bobonaro, 16/10.
Prezidente Konsellu Imprensa dehan ita hahi liberdade, atu tane aas hodi garante katak sidadaun hotu iha rai ida ne’e, tenke iha liberdade ne’ebe garantidu, katak liberdade atu ko’alia no espresa sai sira nia sentimentu liu husi manifestasaun liberdade, atu hetan asesu ba informasaun, liberdade atu hetan moris di’ak tanba ne’e ita hamutuk hahi liberdade, hodi semo aas hanesan foho Ramelau no livre atu iha foho tutun sira ne’e bele rona beila sira nia lian.
“Beiala sira ne’ebe maske la matenek, maibe neon matenek hodi tane nafatin rai ida ne’e, ohin ita konsege moris iha liberdade nia laran tanba ne’e Konsellu Imprensa no Centro Nacional Chega agradese ba Estadu Timor-Leste ne’ebe liu husi Parlamentu Nasional aprova loron 16 Outubru hanesan loron nasional liberdade Imprensa”, dehan Prezidente Konsellu Imprensa
Lamukan dehan liberdade Imprensa hanesan iis ba demokrasia nian, tanba bainhira liberdade imprensa sei iha, signifika demokrasia sei moris, tanba ne’e Konsellu Imprensa hato’o solidariedade ba jornalista sira, inklui iha mundu tomak liu-liu ba sira ne’ebe tenke mate tanba buka lia los no familia sira hotu.
“Hau husu ba jornaliata Timoroan sira katak maske iha kondisaun ne’ebe difisil ita emprenta, maibe nafatin la’o ho pasiénsia, hodi kontinua luta ho konxiénsia tomak, halo kobertura hodi servi nafatin komunidade sira liu husi faktus, katak husik ema hotu iha liberdade labele ema ida hadau ema seluk nia liberdade”, Nia informa.
