Reportajen Joselina dos Santos
Iha loron lansamentu fatuk dahuluk monumentu Liberdade iha Balibo ba trajédia ne’ebe akontese husi tinan 1975-1999, Ministru Prezidénsia Konsellu Ministrus, Fidelis Manuel Leite Magalhães hateten onra boot ba nia, hodi hamutuk ho povu Balibo lansa monumentu liberdade Balibo, tanba sai hanesan pakote selebrasaun marka iha fatin refere, maske atividade barak mak hahú ona dezde loron rua liu ba, maibe konsege kontinua sunu lilin ba jornalista na’in lima ne’ebe mate iha Balibo.
“Monumentu ida ne’e la’os ba reprezentante jornalista na’in lima ne’ebe lakon vida iha Balibo, maibe reprezenta mos ema hotu ne’ebe fó sira nia vida hodi Timor hetan liberdade”, Dehan, Fidelis Manuel Leite Magalhães iha lansamentu fatuk dahuluk ba Liberdade Balibo, iha Postu-Administrativu Balibo, Munispiu Bobonaro, 16/10.
Governante ne’e dehan ita nia prezensa hodi kontinua garante memória, atu bele kontinua moris hodi hetan referensia husi monumentu sira, atu hateke ba pasadu hodi aprende lisaun pasadu nian, tanba importante tebes ba ita bele hakat no fiar-an ho misaun konxiénsia ne’ebe kle’an, atu Timor hetan futuru ne’ebe diak ba jerasaun foun sira, hodi iha loron aban labele sai repetisaun husi pasadu nian maibe kontribui ba sosiedade demokrátika ho livre.
Objetivu husi monumentu Liberdade ne’e atu hanoin hikas ba jornalista nain 5 ne’ebe hetan ohin iha loron 16 Outubro 1975, inklui ema hotu ne’ebe mate tanba luta rai ida ne’e.
