Reportajen Joanina Casemiro
Centro Nasional Chega (CNC) ho Konsellu Imprensa lansa fatuk dahuluk ba monumentu liberdade iha Balibo, maibe laiha reprezenta feto hodi lansa hamutuk fatuk dahuluk.
Ba situasaun ida ne’e Neon Metin halo konfirmasaun ho parte CNC, tanba sa iha lansamentu ne’e laiha reprezentante feto? ba Neon Metin Membru Konsellu Administrasaun CNC, Sisto dos Santos hatán katak los teknikamente ida nee fallansu tékniku, no husu deskulpa bo’ot ba iha failansu sira, maibé iha monumentu memoriál ida ne’e la haree ba feto no mane, kiik ka bo’ot.
“Loos teknikamente ami husu deskulpa bo’ot ho haraik an ami husu deskulpa bo’ot ba fallansu sira ne’e, mais saida mak ita hanoin hela katak símbolu momentu memorial ba liberdade ida ne’e reprezentante ema hotu, la hare ba feto, mane, kiik ka bo’ot, ita nia belun sira ne’ebé LGBITQ ita la haree ba ida ne’e, no mós ba Timor oan hotu,” Sisto husu deskulpa bainhira remata lansa Fatuk Dahuluk, iha Balibo Vila, Domingu 16/10.
Nia salienta tan, ba hirak ne’ebé lakon nia vida ba rai ida ne’e nia liberdade, presiza dignifika sira nia dignidade hotu, so teknikamente ne’e fallansu, ida ne’e la iha intensaun ida katak atu deskrimina maluk sira.
Objetivu atu memorializa, dignifika, no valoriza ema hotu-hotu tantu estranjeiru no Timoroan ne’ebé sakrifika sira ni-an ba mate ba prosesu luta libertasaun nasional.
Monumentu ho medida metro 3 kuadradu sei kompleta ho jardim ne’e reprezenta frente tolu mak; frente armada, frente, klandestina no frente diplomasia. Monumentu mós iha eskada tolu reprezenta Timor-Leste iha faze kolonializmu dala tolu mak Kolonializmu Japaun, Kolonializmu Portugues no Kolonializmu Indonézia.
Ema ne’ebe marka prezensa mak Prezidensia Konsellu Ministru (MPKM), Fidelis Leite Magalhães, Vise Ministru Administrasaun Estatal (MAE), Lino de Jesus Torrezão, Prezidente Autoridade Munisipiu Bobonaro, Ernesto de Oliveira Barreto, Prezidente Konsellu Imprensa (KI), Virgilio da Silva Guterres no Membru Konsellu Administrasaun Centro Chega, Institutu Publiku (CNC, I.P) Sisto dos Santos lansa fatuk dahuluk ba konstrusaun monumentu Liberdade, iha Postu Administrativu Balibo, Munisipiu Bobonaro.
