Reportajen David da Costa
Nasaun Timor-Leste (TL) ho Nasaun Repúblika Indonézia (RI) hahú ona marak oráriu atu halo Diskusaun ba Negosiasaun Fronteira Marítima entre nasaun rua ne’ebe sei hahú aban iha Dili, loron 19 to’o 20 Agustu tinan 2025.
Komunikadu Imprensa ne’ebe Neon Metin asesu husi Media Gabinete Primeiru Ministru nian iha segunda-feira loron 18 fulan Agostu 2025 relata katak ofisiál seniór sira hosi Timor-Leste no Indonézia sei involve iha diskusaun estruturadu hso objetivu atu delimita Fronteira Marítima permanente ida entre nasaun rua.
Negosiasaun marítima formál akontese hafoin tinan lubuk ida hosi diálogu informál, enkontru esploratóriu no troka informasaun téknika sira.
Governu Timor-Leste kontinua komprometidu bá rezolusaun pasífika bá nia Fronteira Marítima sira tuir Lei Internasionál no Konvensaun Nasoins Unidas kona-bá Direitu Tasi nian (UNCLOS, sigla Inglés).
Ronda negosiasaun Fronteira Marítima ne’ebé sei mai subliña dedikasaun kompartida hosi Timor-Leste no Indonézia atu mantein estabilidade rejionál, kaer metin Lei Internasionál no haburas relasaun viziñu ne’ebé di’ak.
Timor-Leste fahe Fronteira Marítima ho Austrália no Indonézia. Iha Marsu 2018 Timor-Leste no Austrália asina akordu ida iha Nasoins Unidas iha Nova Iorke ne’ebé halo delimitasaun bá sira-nia Fronteira Marítima.
Akordu ne’e hetan liu-hosi prosesu Konsiliasaun Obrigatóriu UNCLOS nian. Negosia Fronteira Marítima ho susesu ho Indonézia sei permite Timor-Leste atu kompleta nia soberania marítima no direitu soberania, ne’ebé importante tebes bá governasaun efetiva, konservasaun tasi, jestaun rekursu no seguransa nasionál Timor-Leste nian.