Reportajen David Da Costa
Relasiona insidente konfrontasaun entre Sidadaun Indonézia ho Sidadaun Timor-Leste iha Aldeia Inbate Suku Bikomi Nilulat, Kabupaten Timor Sentral Utara, (TSU), Nusa Tenggara Timur (NTT), Indonézia ne’ebe maka baliza ho Suku Bobometo sub-reijaun Oesilo RAEOA ne’ebe maka rezulta Sidadaun Indonézia ida Kanek, maka Prezidnte Republika (PR) husu Autoridade Rai rua tenke resolve problema ne’e.
Prezidente Repúblika, (PR) José Ramos-Horta hatete, problema ne’ebe maka akontese iha fronteira ne’e, hodi kalan kontaktu ona ho embaixadór Timor-Leste iha Indonézia no Ministeiru Negósiu Estranjeiru no Kooperasaun (MNEK), tanba problema ida ne’e importante tebes atu ko’alia
“Problema sira ne’e importante, ita ko’alia problema sira ne’e, ha’u antes mai, hodi kalan boot tiha ona, ha’u halo kontaktu ho Embaixadór Indonézia, ha’u halo kontaktu ho elementu balun, ita nia Embaixada iha no MNEK Bendito Freitas atu hetan informasaun loloos,” dehan Prezidente Repúblika José Ramos-Horta ba jornalista sira iha Aeroportu Internasionál Nicolao Lobato Comoro Dili, Sexta 29/08.
Nia haktuir, Primeiru problema sira ne’e baibain akontese iha tempu uluk kedas ho populasaun. Maibé Timor-Leste nia forsa ho Indonézia nia forsa interven atu problema ne’e hakmatek tiha.
Nia afirma mais prontu Timor-Leste ho Indonézia nian relasaun metin, Tanba problema ne’e lá’os entre F-FDTL, PNTL ho instuituisaun defeza polísia Indonézia nian ne’e problema ho elementu populasaun sira nian mak hahú problema ne’e.
“Maibé problema sira ne’e ita bele hatete, bele akontese tanba problema, dala ruma falta koordendasaun didi’ak entre autoridade sira iha fronteira, tnaba ne’e autoridade rai rua ne’e tenke rezolve kedas,” hatete Ramos-Horta.
Primeiru Ministru, (PM) Kay Rala Xanana Gusmão, hatete, ohin hasoru malu ho Prezidente Republika José Ramos-Horta hodi informa ba Prezidente kona-ba konfrontasaun ne’ebe maka akontese iha Inbate fronteira Indonesia Timor-Leste nian iha oe-cusse ne’e.
“Ha’u informa ba Prezidente Repúblika kona-ba problema ne’ebé mosu daudauk iha Oekusse ne’eba,” dehan Primeiru Ministru, (PM) Kay Rala Xanana Gusmão, bainhira remata enkontru ho Prezidente Republika Ramos-Horta iha Palásiu Governu, Sexta 29/08.
konfrontasaun iha fornteira, Aldeia Inbate Suku Bikomi Nilulat, Kabupaten Timor Sentral Utara, (TSU), Nusa Tenggara Timur (NTT), Indonézia ne’ebe maka baliza ho Suku Bobometo sub-reijaun Oesilo REAOA ne’ebe maka rezulta Sidadaun Indonézia ida Kanek ne’e, Xefe governu mos hakerek ona karta ba prezidente Republika Indonesia.
“Ha’u hakerek tiha ona karta retira ba Prezidente Repúblika Indonézia, Prabowo Subianto. Hakerek mós surat ba Embaixadór iha ne’e, hodi dehan buka to’ok, tanba ita nia dehan sira maka halo, sira nian dehan fali ita mak halo,” Dehan Xanana
Xefe Governu ne’e dehan, Sei forma ekipa ida atu halo misaun konjunta ida hodi halo investiga didi’ak kona-ba problema ne’e, atu nune’e ba oin labele akontese tan.