Reportajen David da Costa
Empreza husi Kompañia Internasionál Seagell Resort husi Malazia ne’ebe maka loke jogu online iha otel fitun lima Oeupu iha Reijasaun Administrativa Espesiál Oe-Cusse Ambeno (RAEOA), ne’ebé maka Polisia Servisu Investigasaun Kriminal (PSIK) no Servisu Nasional Intelejensia (SNI) halo buska apreensaun no deskonfia maka esplorasaun ba jogu ilisitu no burla informatika, ne’e selu ona osan arendamentu 4 millaun ba reseita naun fiskais Oe-Cusse nian.
Eis Prezidente Autoridade Reijasaun Administrativa Espesiál Oe-Cusse Ambeno (RAEOA) Rogerio Tiago de Fatima Lobato, hatete, antes ne’e empreza husi Kompañia Internasionál Seagell Resort husi Malazia selu ona osan arendamentu 4 milliaun ba reseita naun fiskais ba Oe-Cusse nian.
Nia haktuir, asaun ne’ebe Polisia Servisu Investigasaun Kriminal (PSIK) no Servisu Nasional Intelejensia (SNI) halo buska apreensaun ne’e husik polsia sira halo ninia servisu, tanba ida ne’e tuir lei no orden.
Maibé Empreza husi Kompañia Internasionál Seagell Resort husi Malazia ne’e mos iha nia advogadu atu depende kompañia ne’e, tanba ne’e hein deit husi dezisaun tribunal nian.
“Kompañia entrega 4 millaun, tama ona iha rejeita naun fiskais RAEOA nian, Tanba ne’e husik polisia halo ninia servisu, ema sira ne’ebe sira halo apreensaun ba, sira mos iha advogadu, advogadu depende sira, prontu husik ne’e la’o tuir lei orden ne’ebe iha, ita hein deit dezisaun husi Tribunal,” dehan Eis Prezidente RAEOA Rogerio Tiago de Fatima Lobato Bainhira ba Komprementa Estrutura foun RAEOA nian, iha edifisiu Autoridade REAOA, Sexta 29/08.
Maibé antes Advogadu privadu husi kompaña Seagoull Resourt, haree ona dokumentu husi kompaña katak jogu online, ne’ebé halo iha otel Oeupu RAEOA, hetan autorizasaun husi governu liuhusi Insepesaun Jeral Jogu, nune’e prosesu implementasaun jogu refere la’o tuir koridór prosesu adminitrativu nian, maibé buska ne’ebé Polisia Servisu Investigasaun Kriminal PSIK no SNI antes ne’e halo konsidera desmantela rede kriminozu tranznasional ne’ebé konesidu iha zona ASEAN.
Tanba prosesu ne’e husi parte PSIK halo aprendesaun ba objetu balun ne’ebé maka iha indisius ba jogu ilisitu, maibé sira halo aprosimasaun katak iha rajaun ne’ebé oinseluk, nune’e nia hanesan defeza ba kompañia haree katak prosesu ne’e sei hamosu duvida iha termu prosesu ba regra atividade nian, tanba iha lisensa ne’ebé depozita konfiansa ba ema estranjeiru Xineza no Indonesia hodi halo atividade jogu refere no iha mos prosesu administrativu ne’ebé la’o tuir nia koridor no halo iha fatin ne’ebé publiku ema hotu hatene fatin ne’ebé sira hala’o atividade, nomos iha traballador timoroan iha laran.
Entretantu iha tersa-feira kalan PSIK ho SNI halo buksa aprensaun ba jogu online ne’ebe halo iha otel fitun lima iha Oeupu RAEOA no konsidera jogu refere deskonfia iha atividade ilisitu ho krime oin rua maka sira identifika maka esplorasaun ba jogu ilisitu no burla informatika.
No iha buska ne’e PSIK haree katak iha esplorasaun ba jogu ilisitu maka sira prende desktop unidade 87, laptop 13, telemovel 194, flash disk 3, access poin wif 1, starlink ruter 2, sim card telkomsel Indonesia nian iha 135.
Iha fali burla informatika ne’e sira halo aprensaun desktop 58, leptop 4, impresora 1 ho makina sura osan 1, access point 2, telemovel iha 44, nune’e buska aprensaun PSIK nian ne’e desmantela rede kriminozu transnasionál ne’ebe konesidu iha zona ASEAN nian ne’ebe akontese ona iha Myanmar, Cambodia no Filipina.
