Reportajen David da Costa
Prezidente Repúblika (PR), José Ramos-Horta apoiu polítika deputadu sira iha Parlamentu Nasionál atu sosa kareta foun ba instuituisaun Parlamentu Nasionál (PN).
Maibé labele kada tinan lima tenke sosa karreta foun, nunee mós ba deputadu sira, mas kuandu sosa kareta ba instuituisaun estadu ne’e sosa, para nune’e bele fasilita servisu deputadu sira nia servisu.
“Agora labele sosa kada tinan lima sosa kareta foun, hanesan ha’u rona deputadu balun hatete ne’e lá’os karreta ba deputadu, ne’e karreta ba instuituisaun Parlamentu Nasionál atu halo servisu entaun ne’e signifika karreta ne’e sosa, maibé Parlamentu Nasionál nian,” dehan PR Horta ba jornalista sira iha Aeroportu Internasionál Prezidente Nicolau Lobato Komoro, hafoin fila husi vizita estadu ba Japaun, Sexta 29/08.
Nia argumenta “Bainhira mandatu remata karreta ne’e kontinua Parlamentu Nasionál nian, se nune’e ha’u hanoin laiha problema. Ha’u hanoin sira husu tanba sira presiza, ha’u la problema ba ida ne’e”.
Prezidente Repúblika hatete, mesmu lakonese no lahatene númeru kareta iha instituisaun Parlamentu Nasional nia.
“Ha’u la koñese falta karreta Parlamentu Nasionál nian. Ha’u hatete de’it mak ne’e, iha Prezidensia Repúblika hahú iha 2022, ha’u la autoriza sosa karreta foun ba Prezidensia Repúblika,” subliña Horta.
Tuir nia, iha Palásiu Prezidensiál Sosa truck rua foun, atu lori sasan ba foho, sosa mini bus atu konvida sira husi li’ur mai, atividade barak. Maibé, karreta foun ba Prezidente Repúblika ka staff sira laiha, ne’eduni husi ida ne’e, la’ós problema boot ida tanba la’ós folin boot tebe-tebes, la’ós ho ida ne’e mak poupa osan.
