Reportajen Francisco JDA
Forum Organizasaun Naun govermental Timor-Leste (FONGTIL) hala’o monitorizasaun Vasina Covid-19 iha Munisípiu 12, atu garante partisipasaun sidadaun sira ba vasina, no suporta governu atu hadiak prestasaun servisu Ministériu Saúde (MS) hodi asegura ba Vasina no Prevensaun moras Covid-19 iha Timor-Leste, nune’e bele halo estratéjia di’ak bele fasilita ema ho defisiénsia sira bele tuir vasina iha sentru vasina sira
Liuhusi konferensia imprensa Jestór Programa FONGTIL, Lorenco Tito informa katak, FONGTIL kobre ona, sentru ba vasinasaun 41, maibé perspetiva hosi komunidade seidauk iha asesibilidade no ijiene iha fatin vasina sira, tanba ne’e husu nafatin ba Ministériu Saúde no Parlamentu Nasionál atu nafatin serbisu hamutuk ho lider komunitariu no organizasaun ema ho defisiénsia sira, nune’e bele hasae partisipasaun no promove partisipasaun.
“Asesibilidade hanesan sentru Vasina iha suku sira area remota no rural importante tebes atu promove partisipasaun ema ho defisiénsia, no presiza kria kondisaun bele asesu ba vasina iha fatin hotu,” hatete Jestor FONGTIL Lorenco Tito iha Salaun FONGTIL,25/10
Jestor FONGTIL ne’e subliña monitorizasaun ne’ebé FONGTIL hala’o iha Munisípiu 11 inklui mós RAEOA durante loron 2 nia laran, nota katak ema ho defisiénsia foin ba vasina iha de’it 0,17 % tanba ne’e husu mós ba Ministériu Saúde (MS), atu nafatin halo estratéjia di’ak atu nune’e maluk ema ho defisiénsia sira bele asesu ba Vasina Covid-19.
Tuir dadus sensus 2015, hatudu katak ema ho defisiénsia iha territóriu tomak iha nain 38,118. Nune’e iha situasaun covid-19, ho númeru 0,17% ema ho defisiénsia ne’ebe hetan ona vasina, signifika sei barak mak sedauk hetan vasina covid-19.
