Reportajen Silvino Freitas
Fundu Populasaun Nasoens Unidas (UNFPA) asina memorandu entendimentu ho Ministeriu Ensinu Superior Siensia no Kultura (MESSK) hodi halo investimentu ba edukasaun parteira nian neebe sei implementa iha eskola superior sira neebe loke kursu parteira, hodi apoia eskola superior hametin edukasaun parteira nian.
Country Representative UNFPA ihaTimor Leste Navchaa Suren dehan, UNFPA dadaun nee foku mundialmente ba inan isinrua tenke partu ho seguru, tanba dadaun nee iha mundu tomak kada loron feto 700 resin no bebe nurak 6300 mate durante isinrua no partus, meibe maioria husi mate hirak nee bele prevene ho servisu pre-natal, partu no pos-natal neebe fornese husi parteira sira, nunee evidensia global hatudu katak edukasaun, formasaun, apoiu no ambiente neebe adekuadu bele fornese too 90% servisu esensial saude seksual, reprodutiva, maternal no bebe foin moris.
“investimentu iha edukasaun parteira nian sai hanesan estratejia neebe efetivu liu no iha impaktu boot atu reduz mortalidade no morbilidade maternal no bebe foin moris” dehan Country Representative UNFPA ihaTimor Leste Navchaa Suren, iha salaun nobre MNEK Praia dos Coqueiros, (01/09).
Nia dehan tan, UNFPA servisu hodi hametin kualidade edukasaun parteira, politika, regulamentu no asosiasaun parteira nian iha mundu tomak, nunee sira apoiu husi nasaun 125 inklui nasaun neebe taxa mortalidade maternal maka as liu, nunee iha timor leste parteira sira maka iha lina oin ba sistema saude liuliu iha area rural no fatin neebe susar atu asesu, maibe sira nia kapasidade fornese kuidadu ho kualidade as tuir kualidade formasaun no edukasaun iha timor leste, nunee sira nia asinatura MoU nee pasu importante atu kumpri komprimisiu iha kualidade edukasaun inklui komprimisiu global sira konaba reduz mortalidade maternal neebe bele prevene no garante asesu universal ba servisu saude seksual no reprodutiva ho kualidade.
“UNFPA ho MESSK hamutuk ho parseiru sira seluk sei halo revizaun kompletu no melloramentu ba edukasaun parteira garante katak politika no kurikulu no padraun edukasaun alina ho padraun global neebe difini husi Konfederasaun Internasional Parteira (ICM)” nia dehan.
Enkuantu MESSK Jose Honorio da Costa dehan, dadaun ensinu superior neebe eziste iha timor leste barak maka loke kursu parteira nunee atu garante kualidade edukasaun iha area parteira nian maka MESSK tenke halo parseria ho UNFPA liuhusi governu tailandia hodi hetan tulun ba kursu parteira sira neebe dadaun nee eziste ona, tanba antes nee governu tailandia maka apoiu treinamentu no formasaun ba parteira sira.
“ho governu tailandia nee importante tebes hanesan mos ita halo ona ho Malaysia cambodja indonesia nunee tenke iha mos ho tailandia tanba dadaun nee estudante balun estuda hela mestradu no lisensiatura iha tailandia maibe seidauk iha nota entendimentu ho tailandia” dehan MESSK Jose Honorio iha salaun nobre MNEK, Praia dos Coqueiros, (01/09).
Nia konklui, nota entedimentu neebe halo ho tailandia nee pasu ida importante tebes tanba iha programa nonu governu nian iha kooperasaun balun neebe liga ho area saude no area sira seluk iha governu ida nee nian liuliu iha MESSK, nunee nota entendimentu neebe asina nee parte hanesan sumbrina ida ba instituto superior ho universidade hotu neebe loke kursu parteira hodi implementa politika formasaun no kapasitasaun no iha mos kurikulum ba kursu parteira neebe la hanesan nunee husi nota neebe asina ona bele halo kurikulum neebe hanesan ba estudante sira
