Reportajen Silvino Freitas
Sekretáriu Estadu Asuntu Toponímia no Organizasaun Urbana (SEATOU) kontinua apela ba komunidade sira neebe hela iha sidade Dili atu labele haki’ak animal fahi besik sira nia hela fatin, hodi evita hada’et moras ba fahi na’in nomos ba vizinu sira neebe hela besik, tanba antes husi parte SEATOU halo ona atusaun balun iha Dili laran no pior liu iha parte balun komunidade hakiak besik meza han fatin no balun hakiak iha andar leten.
SEATOU Germano Santa Brites dehan, animal fahe nee evita tebes atu hakiak tanba komunidade balun neebe hela iha sidade dili balun hakiak fali fahi iha andar leten neebe sira halo ona atuasaun, nunee mos iha parte ai-tarak laran mos komunidade balun hakiak besik kedas iha meza han nian.
“iha delta ami foti iha andar leten fahi hakiak iha andar leten, iha tan palasiu prezidente nia oin nee hakiak iha kedas meza han nia sorin, hau la hatene sabor fahi nia mai ita nia inus nee oinsa ho hahan nee oinsa” dehan SEATOU Germano Santa Brites iha ambitu sensebilizasaun lei odem publika ba F-FDTL iha Kuartel Jeral Fatuhada, (14/10).
Nia dehan tan, komunidade neebe atu hakiak fahi bele hakiak dook husi hela fatin no liuliu iha sidade laran labele hakiak besik ema nia hela fatin, nunee husi parte SEATOU kontinua halo operasaun iha sidade laran nunee komunidade sira tenke hakiak dook fahi tanba kuandu operasaun lao mak hetan sei foti.
“familia sira neebe hela iha sidade Dili halo favor animal fahi nee hakiak dook lori ses husi sidade Dili hodi evita moras ba ita” hakotu Germano.
