Reportajen David da Costa
Eis Primeiru Ministru atuál Sekretáriu Jerál Partidu Frente Revolusionáriu Timor-Leste Independensia (FRETILIN) Marí Bim Amude Alkatiri, hasoru malu ho Arcebispo Arquediocese Dili Dom Virgilio Cardeal do Carmo da Silva SDB ko’alia kona-ba lideransa polítika no lideransa husi konvensuan relijioza sira tenke hamutuk hadia dezafiu sira ne’ebé Timor-Leste hasoru.
Sekretáriu Jerál Partidu Fretilin, Marí Bim Amude Alkatir, hatete, ohin enkontru ho Arcebispo Arquediocese Dili Dom Virgilio Cardeal do Carmo da Silva SDB ida ne’e husu kleur ona, mais depois halo tiha viajen ba Irlanda, Portugál, Inglatera ne’e mak ohin hetan oportunidade tan hasoru malu fali, loron ida ne’ebé di’ak tebes.
“Ha’u dehan di’ak tanba konsege duni ko’alia ho onestidade ko’alia naruk, ha’u define di’ak ha’u nia opiniaun kona-ba funsaun sosiál, funsaun morál, funsaun patriótika Igreja Katólika nian ne’e mak ha’u aprejenta ha’u nia opiniaun. Ha’u hanoin katak ho situasaun ida ne’ebé susar tebe-tebes ita nia rain agora hasoru daudauk presiza duni ita atu hanoin hamutuk halo nusa mak ita bele la’o hamutuk parseira polítiku ho lideransa konvesaun relijioza, liu-liu Igreja Katólika, nune’e, pelumenus bele haree naroman iha oin, labele nafatin iha nakukun nia laran,” Informa Marí Alkatiri ba jornalista sira hafoin enkontru ho Arcebispo Arquediocese Dili Dom Virgilio Cardeal do Carmo da Silva SDB iha Kámara Exelensiastca Arquediocese Metropolotania iha Lecidere, Kuarta 19/11.
Nia haktuir, opiniaun ne’ebé hato’o ba Cardeal mak ne’e, uluk kedas Dom Basilio nia tempu, husu Dom Basilio atu hahú prosesu ida Maubessi 1, Maubessi 2 depois gagal tiha, tanba problema entre lider politiku sira no sei deskomfia ba malu.
“Tanba sempre problema entre ami líder ne’ebé atu sai besi tuan hotu ona ne’e, ami seidauk fó fiar ba malu, ami sei deskonfia ba malu, ami seidauk hanoin hanesan. Mais uluk tanba ami hotu iha inimigu ida komun, ami konsege tur hamutuk, ami konsege luta hamutuk ami konsege duni ho apoiu boot tebes populasaun tomak Igreja Katólika konsege duni restaura indepedensia,” nia hateten,
Nia salineta, agora lori indepedensia, lori mós demokrásia mai, demokrásia nia funsaun ne’e atu sai funsaun pozitivu nune’e ema bele hanoin ho liberdade bele organiza an ho liberdade, liberdade bele fó kontribuisaun, tanba inimigu laiha ona.
Maibé, parese la kompriende ida ne’e, tenta hanoin ona katak ho demokrásia ne’e, tanba konsege duni alia ba alia mai hetan maiória iha Parlamentu Nasionál, entaun maiória ne’e mak demokrásia ona.
Nia argumenta, demokrásia la para iha maiória, para iha polítika atu iha intendimentu, polítika ida inkluzaun nasionál, liu-liu polítika ida atu haree fila fali kauza ne’e saida ba ema hotu, atu bele hetan naroman ba aban bainrua.
“Buka malu ne’e uluk ita buka malu ona, ha’u atu halo ona ha’u nia parte, bainhira ha’u dehan tenke iha pensamentu krítiku, ka masa krítiku, mais ita atu dezenvolve pensamentu krítiku ka masa krítiku tenke uza hotu ko’alia ida ne’e saida mak ita ko’alia. Nune’e labele hanoin ka pensamentu krítiku atu krítika de’it, nune’e ko’alia kontribui buka solusaun, labele nonok,” nia subliña.
“Ita asvezes sai kompletamente matan delek hotu koletivu, diuk hotu koletivu, depois ibun mós la ko’alia ona koletivu hotu, ne’e mak ita nia situasaun atuál,” nia konklui.