Reportajen David da Costa
Eis Primeiru Ministru atuál Sekretáriu Jerál Partidu Frente Revolusionáriu Timor-Leste Independensia (FRETILIN) Timor-Leste komemora loron proklamasaun unilaterál independensia ba tinan 50 ona, maibé seidauk kore povu husi mukit no kiak ne’e mak governu no estadu haluha tiha.
Sekretáriu Jerál Partidu Fretilin, Marí Bim Amude Alkatiri, hateten, tinan 50 fahe ba rua, purtantu tinan 24 bele dehan Timor manan ho difikuldade tomak, ema mai ho aviaun laiha aviaun, ema mai ho tangki laiha tangki, ema mai ho kainaun, laiha kainaun, mais manan, tanba iha unidade nasionál, tanba iha kauza komún ne’e tinan 24.
“Ita lori liberdade, lori demokrásia, mais ita haluha tiha kauza komún ne’e atu kore povu husi mukit, husi kiak ne’e mak ita haluha tiha,” dehan Marí Alkatiri ba jornalista sira hafoin remata enkontru ho Arcebispo Arquediocese Dili Dom Virgilio Cardeal do Carmo da Silva SDB iha Kámara Exelensiastca Arquediocese Metropolotania iha Lecidere, Kuarta 19/11.
Nia hatete, entaun buka inventa inimigu foun, inimigu mak se loos, asvezes ema ida de’it la gosta, maibé kontra ema hotu-hotu. Tanba iha tinan tolu nulu ativu tan iha tinan liman mai atu entrega no kria kondisaun ba lideransa foun atu moris, maibé lider politiku sira la konsege iha intendimentu ba malu.
“Ami ne’e iha tinan lima tan, bele moris tan tinan rua nolu, tolu nolu mais ativu iha tinan lima tan atu entrega signifika kria kondisaun nune’e lideransa foun atu moris. Se tinan lima ne’e mak ami na’in lima ka na’in neen ne’e la konsege iha intendimentu, aban bainrua ha’u hanoin katak diabu de’it sei la simu ami iha ne’eba,” nia afirma.
Sekjer Fretilin ne’e mos la kompriende tanba saida tinan 50 espesiál, se espesiál tanba tinan 50 invez halo festa. Maibé bainhira sai membru ASEAN ne’e nia konkorda Timor tama ASEAN, halo festa boboot, hein to’o tinan lima nolu mak Timor halo festa boboot, ne’e espesiál, mais la’ós festa.
“Espesiál bainhira bele dehan ho tinan 50 ne’e la’o to’o iha ne’ebé ona iha prosesu dezenvolvimentu, espesiál ita bele dehan tinan lima nolu nasaun ne’e iha ona ka seidauk, konsolidadu ona ka seidauk, estadu ne’e konsolidadu ona ka seidauk, bele ko’alia ida ne’e, tenke halo balansu, ne’e mak ha’u dehan ami na’in lima ka na’in neen ne’e asvezes infernu lakohi ami karik. Serteja katak ha’u hetan konvite mai husi governu, se ha’u la hetan mak sala, mais ha’u nia fotografia de’it sira tauk, ba iha ne’eba halo nusa, karik iha konvite, ha’u ba tur ho povu,” nia esplika.
Nune’e mos Sekjer Fretilin esplika, atu ajuda na-tranzisaun, jornada foun ne’e hahú agora, halo primeiru uluk jornada foun hahú agora, hahú primeiru jornada tinan 50 ona. Tanba saida mak agora hahú jornada foun, Timor-Leste tama ba ASEAN ona saida mak lori ba ASEAN ne’e mak jornada foun tenke hahú agora. Tanba se hakarak duni tama ba ASEAN, hatudu diferensia, diferensia mak saida, diferensia rai ida kiak liu iha ASEAN.
Entretantu antes ne’e, iha loron 08 Outobru 2025, Konsellu reuniaun Ministru, kuarta ne’e, liuhusi konsellu minstru aprova lema “Que a celebração destes 50 anos, do passado, nos assegure confiança no presente e esperança no futuro”, hodi komemora loron proklamasaun independénsia RDTL ba da-50 (28 Novembru 1975-28 Novembru 2025) neʼebé unilateralmente proklama iha 28 Novermbru 1975.
