Reportajen SIlvino Freitas
Akordaun Tribunal-Rekursu ba ezonerasaun Prezidente Radiu Televizaun Timor Leste, Empreza Publika (RTTL,EP) Naldo husi VIII Governu Konstitusional iha tinan 2019, maka Tribunal-Rekursu kondena estadu Timor Leste, no eziji selu kompensasaun ho tipu rua maka salariu korrespondente no prejuizu naun patrimonial inklui mós juru taxa legal 6%.
Eis Prezidente RTTL-EP Naldo Rei haktuir, nia hahu halao nia knaar hanesan Prezidente Konsellu Administrasaun RTTL-EP, durante mandatu VII governu konstituisional neebe hahu ukun iha 15 Setembru 2017, tuir kontratu neebe nia asina iha 1 Fevereiru 2018, husi Sekretariu Estadu Komunikasaun Social iha VII governu konstituisional ,nunee nia mandatu nia mandatu ikus liu iha 31 Janeiru 2022, iha ninia mandatu hanesan funsionariu, hotu hotu simu salariu husi orsamentu duodesimu husi transferensia publika neebe jere husi VII governu, maibe molok VII governu remata ukun transferensia publiku ba pagamentu salariu ba fulan Jullu 2018, tama tiha ona konta bankaria RTTL-EP.
“ho laran haksolok hau Naldo Rei simu informasaun katak Tribunal Rekursu emiti ona akordaun, katak foti desizaun ikus ona konaba nia keixa neebe hatama husi firma advogadu Da Silva Texeira Asosiadu, Lda, neebe reprezenta hau iha kazu ezonerasaun, la ho kauza justa neebe Konsellu Ministru determina, tuir rezolusaun aprova iha 9 Janeiru 2019” dehan Eis Prezidente RTTL-EP Naldo Rei lihusi konferensia imprensa iha salaun HAK Farol, (03/02).
Nia dehan tan bainhira VIII hahu ukun iha 22 Junu 2018, RTTL tutela iha SEKOMS Mericio Akara, RTTL hasoru difikuldade finanseira no presaun oioin husi memebru governu neebe mai husi mos Ministru Reforma Lejislativa no Asuntu Parlamentares Fidelis Magalhães maibe nia hamutuk ho funsionariu RTTL tomak halao nafatin servisu ho rigor no prefesional, nunee iha fulan Agostu 2018 VIII governu lakohi duni halo transferensia publika ba RTTL, maski nia halo pedidu dalabarak neebe diriji ba governu, nunee nia hamutuk ho membru vogal RTTL sira hodi selu funsionariu sira ho osan publisidade nian, tanba funsionariu sira halao ona servisu tuir kontratu neebe asina ho Prezidente sesante Milena Abrantes iha VI governu konstituisional.
“biar la aprezenta rezultadu auditoria ho faktu ka fundamentu juridiku neebe deit Konsellu Ministru desidi ezonera hau iha 9 Janeiru 2019 no nomeia kedas Francisco da Silva Gari mak sai fali prezidente RTTL hodi troka hau, Konsellu lakohi konsidera hau nia direitu ba defende an hasoru alegasoens falsa sira, no hau nia direitu atu kontinua servisu nuudar sidadaun timoroan ida ho kualifikasaun komprovada iha area media ” dehan Eis Prezidente RTTL-EP Naldo Rei.
Nia haktuir, nia konsidera desizaun hatun husi Konsellu Ministru nee la justu, nunee nia husu ajuda ba firma advogadu Da Silva Texeira & Assosiadu, Lda hodi hatama keixa hasoru VIII governu konstituisional iha tribunal dili iha fevereiru 2019 nunee tribunal dili no tribunal rekursu lori tempu kleur hodi hakotu kazu nee ikus mai foti desizaun ho imparsialidade tomak, husi akordaun tribunal nian IX governu halo rekursu ba tribunal rekursu maibe iha loron 9 Outubru tribunal rekursu hakotu prosesu nee ho akordaun ida halo desizaun sala governu nian, husi akordaun refere tribunal desidi kondena estadu Timor Leste no ezije selu kompensasaun ba nia pagamentu tipu rua maka selu nia salariu korespondente ba periodu entre 16-01-2019 no 01-02-2022 katak tinan 3 no fulan ida ho montante total USD 68.094.00 ,no mos juru sira ho taxa legal 6% hahu sura husi data sitasaun too loron pagamentu nunee selu mos ninia montante USD 2.000.00 ba prejuizu naun patrimonial ho mos taxa legal jurus 6%, hahu sura husi data sitasaun too loron pagamentu.
“Vitoria nee hau oferese ba povu ain tanan sira, povu kbiit laek sira, povu neebe hamrook ba justisa no ba povu Timor-Leste neebe luta ba lialoos, imi mak hau nia aspirasaun no Vitoria nee bah au no ita tomak” konklui Eis Prezidente RTTL-EP Naldo Rei.