Reportajen Silvino Freitas
Sekretariu Estadu Formasaun Professional no Empregu (SEFOPE) Rogerio Araújo Mendonça apela ba traballador sira neebe hetan oportunidade husi governu ba servisu iha rai-liu atu labele involve an iha partidu hodi ataka governu bainhira sei iha hela missaun hanesan traballador tanba nee traballador sira neebe kontinua ataka governu sei buka tuir deporta fila mai timor leste.
SEFOPE Rogerio Araújo Mendonça dehan, traballador sira neebe dadaun nee iha Korea kuandu seidauk hetan oportunidade sira hatudu sira nia respeitu maibe kuandu hetan tiha oportunidade hodi ba servisu tiha iha Korea traballador sira hahu envolve an iha politika hodi halo influensiasaun ba malu hodi halo enkontru sira hodi ataka governu.
“Hau hateten ba ita boot sira ataka ema pesoal la problema, mais ataka governu imi hela iha neebe mos hau bele koalia deit ba ARD imi bele sai ona husi sistema mos ita boot sira tenke fila” dehan SEPOFE Rogerio Araújo Mendonça iha ambitu selebrasaun kontratu ho traballador ba Korea Sul iha Timor Lodge, (06/03).
SEFOPE Rogerio apela ba traballador sira katak, kestaun grupu entre arte marsial ritual no partidu nee tau iha nia fatin atu labele partidariza missaun hanesan traballador iha ema nian rain atu ataka fali governu ida neebe buka oportunidade ba timoroan hodi hetan oportunidade ba servisu, nunee nia chama atensaun ida ba traballador sira tanba iha evaluasaun neebe sira halo traballador sira sempre hemu tiha tua lanu hodi ataka governu tanba nee husi parte SEFOPE sei haruka fila no balun konsege fila duni ona tanba nee traballador sira neebe hetan ona oportunidade atu bele uza oportunidade sira nee ho didiak tanba iha joven sira seluk neebe atu hetan oprtunidade sira hanesan nee maibe susar.
“ida nee laos ameasa ita boot sira maibe tenke hatudu ita nia maturidade, ita mai husi ita nia inan aman sira neebe eduka ita, ita boot sira mai hamriik iha nee ho susesu laos husi imi deit, maibe kontribuisaun husi imi nia inan aman sira mos hola parte iha fatin ida nee” konklui SEFOPE Rogerio Araújo Mendonça.