Reportajen Umbelina dos Reis
Centro Nasional Chega (CNC), hamutuk ho movimentu letras, sala leitura Xanana Gusmão, Tio Publising no Comite Orentador (CO25), realiza atividade feira livru, objetivu atu promove kultura lee livru istoria konaba direitus umanus, paz no rekonsilisaun iha komunidade. Promove no valoriza matenek Timor oan sira nian.
Diretór Executivu Centro Nasional Chega (CNC), I.P Hugo Maria Fernandes, hateten objetivu prinsipal husi feira livru ne’e, atu promove kultura lee iha publiku liu-liu ba estudante sira ne’ebe susar atu asesu ba livru. Atividade referidu ne’e, oinsa atu valoriza matenek timoroan sira nian, liu-liu kria espasu ba dialogu, diskusaun no promove kultura leitura iha komunidade no mos promove livru oin-oin kona-ba istória, direitus umanus, paz no rekonsilisaun iha komunidade.
“Ita lee livru laos lee de’it fraze sira, maibé oinsá ita komprende no kestiona fila-fali ba livru ne’e katak tanba sa mak autor sira hakerek hanesan ne’e, no saida mak sei menus hosi livru ne’e. Presiza halo komunikasaun ba livru refere.” Dehan Diretor Ezekutivu Centro Nasional Chega, Hugo Maria Fernandes, liuhosi nia abertura ba serimonia Feira Livru nian, iha salaun antigu komarka balide, kuarta-feira, 11/03.
Entretantu objetivu seluk mak, promove kolesaun livru ba biblioteka Chega nian, no estimula kultura lee entre foinsa’e sira, oinsá aprende konaba istoria Timor-Leste. Alende ne’e, feira livru mos atu hametin kooperasaun entre biblioteka sira iha Dili, liu hosi realizasaun atividade hamutuk nu’udar opsaun ba publiku kona-ba referensia livru sira, maibé dalan ida atu biblioteka sira kompleta ninia kolesaun sira.
“Diskusaun konaba feira livru laos hanesan feramente atu ba haree livru, maibé oinsá atu imi nani no luku klean liu saida mak livru ne’e no aspeitu saida hosi livru ne’e.” Nia dehan.
Nia konklui, Livru ne’e sei halao durante loron 2 hahu iha loron kuarta-feira to’o kinta-feira, (11-12 Marsu 2026), ne’ebé sei kompleta ho atividade hanesan feira livru, diskusaun livru, human library no story telling.
Iha fatin hanesan estudante sekundáriu jeral oriental Timor Oan lorosa’e, (ESJOTL), Daniela Mendonça Trindade, informa atividade referidu importante tebes ba sira, oinsá atu bele buka hatene kona-ba istoria Timor-Leste nia iha tinan 1975-1999 nian.
“Hosi livru sira ne’ebe ami lee ne’e, oinsa atu buka hatene klean liu tan kona-ba situasaun ne’ebé akontese iha tempu pasadu ami la hare no la sente, maibé liuhosi lee livru ne’e ami bele hatene kle’an konaba istoria luta ba indepedesia Timor-Leste nian.” Nia dehan.
Nia dehan tan, durante ne’e estudante barak mak la tau importánsia ba lee livru sira, maibe hosi atividade sira ne’e bele motiva estudante no foinsae sira atu tau importánsia leitura ba livru.
Entretantu estudante universidade nasionál timor lorosa’e, (UNTL), Florenzo Golter da Silva, aprofunda, husi feira ne’e sira bele aprende buat barak, liu-liu kona-ba istória luta nian.
“Feira ne’e importante tebes ba estudante no foinsa’e sira, tanba bele fo hanoin mai ita katak, libertasaun ba patria luta ba liberdade iha rai ne’e la fasil.” Nia dehan.