Reportajen Adroaldo ‘Saretukau’
Lideransa Konunitáriu Suku Comoro, Eligio José da Silva Marçal, hatete, governu liu hosi Ministériu Juventude Desportu Arte no Kultura, hamutuk ho autoridade lokal ba haree ona fatin atu konstroi estádiu.
“Sira hatudu tau los iha Bandeira riin mutin, ikus mai iha komunidade balu mai ko’alia, tanba sá ida ne’e bele akontese iha ne’e, entaun iha balu lakohi iha balu hakarak, iha benefísiu maibé haree ba fatin relijiozu,” dehan Xefe Suku Comoro iha Otél Timor, 11/03.
Aban bairua sekarik iha prezensa Papa selu-seluk karik, ita haree fatin ne’e la furak, lideransa konunitáriu ne’e dehan.
Ba estádiu refere, autoridade ne’e hato’o, katak Bispo sira la hatan.
“Ba ha’u ita tau iha fatin ne’eba kloot. Depois estraga ona ambiente fatin relijiozu nian, ita haree fatin seluk. Kampaña mos ita ba Tasi-Tolu, Amu Papa mai ba Tasi-Tolu, buat hotu ba Tasi-Tolu de’it, nusa la haree fatin seluk.”
“Ha’u Rona tuir ha’u-nia komunidade, la aseita.”
Entretantu Fideliza Loriana, nu’udar joven nia hakarak Governu tenki harii estádiu ida, atu nune’e, joven sira duni tuir sira nia mehi, no ba sira ne’ebé iha talentu desportivu nian.
“Ema rai li’ur joga mai joga iha ita-nia rai rendimentu ba ita-nia nasaun, no sira bele haree Timor ne’e nia kondisaun oinsá.”
Maibé nia la konkorda harii iha Tasi-Tolu.
“Ha’u ladun konkorda tanba igreja (altar Tasi-Tolu) ne’e fatin sagradu to, ema atu ba adorasaun iha ne’eba, halo Misa iha ne’eba. Halo estádiu iha ne’eba, halo fo’er pois ema labele ba halimar, pois estraga ambiente. Depois fatin sagradu ema barullu iha ne’eba kan ladi’ak.” Nia diskorda ho governu nia planu harii estádiu.
Entretantu Federasaun Futebol Timor-Leste, aprezenta ona dezeñu estádiu, no fatin ba konstrusaun estádiu halo konfirmasaun ona ho Bispo Diocese Dili, Baukau no Maliana maibé seidauk iha aseitasaun loloos.
