Reportajen David da Costa Gusmao
Estudante husi Eskola Ensinu Basiku Sentrál (EBS) Daisoli, Postu administrativu Aileu vila, Munisípiu Aileu, Claudia Ximenes asume pozisaun nu’udar Prezidente Konsellu imprensa (KI) durante oras ida nia laran, atividade ne’e organiza husi Plan Internasionál iha Timor-Leste, hodi komemora loron internasinál Labarik, ne’ebé monu iha Segunda (11/10).
Claudia Ximenes sente kontente bainhira Prezidente Ezekutivu Konsellu Imprensa fó oportunidade ba nia, hodi lidera KI iha oras balun nia laran. Bainhira partisipa iha atividade ne’e, atu motiva-an hodi partisipa iha atividade atu hasae koñesimentu diak liu iha futuru.
“Ha’u sente orgullu tebes bainhira asume kargu prezidente KI , ha’u fiar katak iha momentu ida ne’e, Sr. Virgilio sei tau fiar liu tan mai ha’u atu lidera, deside no moris buras. Ha’u sei kontente bainhira partisipa iha atividade ne’e, atu motivu ha’u nian-an rasik, hodi ba partisipa iha atividade ne’ebé de’it, atu bele hasae ha’u nia koñesimentu di’ak liu tan iha futuru mai,” dehan Claudia iha nia diskursu iha salaun KI, Kintal Boot, Sesta 08/10.
Nia rekomenda ba KI no Governu relevante sira, hamoris no garante liberdade biban no leet ba feto no mane hanesan, liu-liu ba labarik feto sira atu asesu média, média sosiál ne’ebé seguru husi pornografia no informasaun falsu sira.
Husu mós atu garante promove no sidadaun sira nia diretu no liberdade fundamentál, hari sosiedade ne’ebe mós hatuur iha justisa sosiál nia laran, atu hakiak sidadaun sira nia moris ba isin no klamar.
Iha fatin hanesan Setór ba programa Parentidade no Nutrisaun Plan internasionál, Dirsia Sarmento afirma atividade ne’e la’ós foin ba da-huluk maibé ne’e beibeik ona no iha mundu tomak hotu halo, hahú husi labarik sira asume kargu ezekutivu iha oras balun nia laran.
“ne’e hanesan kampaña ida ne’ebé Plan internasionál halo iha mundu tomak, atu nune’e labarik sira aprende sai lideransa ida ne’e oinsá, hodi fo oportunidade ba labarik feto sira atu bele realiza sira nia mehi husi dalan sira hanesan ne’e”, nia esplika.
Iha fatin hanesan Konsellor Expedito Dias Ximenes iha Konsellu Imprensa agradese ba Plan Internasinál nia atividade anuál ida ne’e, haree ba iha kontestu atu simu lideransa ida iha oras ida ka iha loron ida, konserteza Plan iha nia objetivu atu prepara foinsa’e oinsa atu toman kaer ka sai lideransa ida ho di’ak, maibé iha mós pontu fraku no forte.
“Ba hau, pontu de vista husi ema média iha pontu fraku no pontu forte. Pontu forte mak preparasaun antes oinsa joven ida atu sai lider no lideransa iha tempu oin mai, no pontu fraku mak dala barak ita bele halo atividade hanesan ne’e lakon tempu, hanesan alin Claudia agora nia eskola, nia mós lakon nia tempu balun eskola nian,” nia dehan.
