Reportajen Santina Lucia da Costa
Embaixadór Timor-Leste ba Repúblika Indonesia (RI), Filomeno Aleixo da Cruz sei fó prioridade ba asuntu haat hanesan hametin kooperasaun iha setór edukasaun, ekonomia, esforsu buka tuir restu mortais heroi nasionál no aselera tratadu fronteira rai-maran no tasi nian.
Hafoin simu pose Embaixadór Timor-Leste ba Repúblika Indonesia (RI), Filomeno Aleixo da Cruz, hateten tenke kuidadu ita nia relasaun di’ak ho Indonesia importante tebes, dalan naruk ita la’o tiha ona, presiza atensaun maka’as saida mak agora sei hakarak alkansa, Fronteira, hametin ita nia relasaun, haree mós estudantes sira bar-barak iha ne’eba, dadus ne’ebé presija atualiza beibeik.
Filomeno konsidera fronteira ne’e laiha separa mais nafatin iha vincula jurídiku ida-idak nian para halo senerjia foun atu serbí didi’ak povu husi nasaun rua ne’e, ho dalan legál tuir lei ida-idak nian.
“Kuadru jerál ida tenke kaer, depois kaer buat ida ita dehan espíritu rekonsiliasaun, atu kuidadu didi’ak ita nia relasaun amizade, kooperasaun ho povu no estadu Indonesia, tuir saida maka hakerek nanis ona iha Comissão Verdade e Amizade (CVA) ho Comissão Acolhamento Verdade e Amizade (CAVR).” Embaixadór Timor-Leste ba Repúblika Indonesia (RI), Filomeno Aleixo da Cruz iha Palásiu Prezidensiál Nicolau-Lobato, Bairo-Pite, 8/10.
Embaixadór Timor-Leste ba Repúblika Indonesia (RI), hatutan prosesu rekonsiliasaun la’o hela presiza estadu rua ne’e hotu hatene tau matan, hatene kaer, hatene kuidadu, vida sempre iha ninia dinamika ida ké úniku.
Kooperasaun iha area edukasaun nian, Embaixadór ne’e preokupa númeru estudantes iha Indonesia ne’ebé barak tebes mak namkari iha providénsia sira iha Indonesia hodi hala’o sira nia estudu.
“Hau tau atensaun ba ida ne’e tanba dadus ne’e mak seidauk atualiza didi’ak entaun tenki serbisu ho konsolares iha Jakarta, Bali, Kupang, Atambua, halo esforsu para atualiza dadus kona-ba ita nia estudantes tau matan ba komportamentu ruma ké presija hadi’a entre estudantes Timoroan sira.” Dehan, Filomeno Aleixo da Cruz.
Nia akresenta, Atu hamenus peska ilegál iha ita nia rai laran, ne’e atensaun boot ida hotu, oinsa fasilita buat sira ne’e, maibé Ministeriu relevantes iha knaar própriu ne’e tenke halo sira nia parte, embaixadór sira loke dalan ba tuku odamatan, kria kondisoens maibé labele mesak tenki enkuadradu iha politika governu ninian.
Nia realsa tan katak, kona-ba Ita nia Heroi barak mak antes ne’e lakon, ne’e asuntu ida ké book rai rua ne’e hotu, halo rai rua ne’e hotu tenki tau atensaun, ultrapasa ida ne’e, rezolve buat ne’e, hametin liu tan ita nia relasaun di’ak no amizade.
“Sertamente hau tenki uza mandatu ne’ebé estadu fó fiar mai hau atu halo buat ruma tanba tempu naruk ona ita koalia, maibé parese presija halo tan buat ruma, presija dedika-an fó atensaun maka’as, Embaixadór halo nia knaar, maibé estadu rua ne’e ho sira nia autoridade sira mós tenki tau hotu atensaun, tau laran tomak, prosesu ne’e la fasil maibé ita tenki hala’o.” hateten, Filomeno Aleixo.
Nia hatutan, Asuntu sira hanesan nene ita labele koalia “Tuntas” se tampu naruk ona to’o agora ita seidauk “Puas” ba buat ruma ita hakarak, ita tenki iha pasiensia mós ita nia-an, pasiensia mós hotu-hotu tenki envolve-an, matadalan maka Comissão Verdade e Amizade (CVA) ho Comissão Acolhamento Verdade e Amizade (CAVR) kuadru mak tenki orienta ita rezolve buat ida importante restu mortais ita nia herois sira nian, ema ne’ebé lakon vida ita lahatene nia paradeiru iha ne’ebé.
