Reportajen Silvino Freitas
Relasiona informasaun espalla iha media sosial facebook katak iha sistema familiarizmu no kobaransa illegal iha prosesu rekrutamentu traballador Sazonal Worker Program (SWP) ba Australia nunee Sekretariu Estadu Formasaun Professional Empregu (SEFOPE) Rogerio Araújo Mendonca konsidera informasaun laloos nunee karik kandidatu sira lamenta ho informasaun refere bele aprezenta evidensia hodi hatoo keixa iha ministeriu publiku no pronto responsabiliza.
SEFOPE Rogerio Araújo Mendonca dehan, identidade falsu husi media sosial neebe publika kobaransa ilegal, laiha transparansia no familiarizmu iha prosesu rekrutamentu nee nia konsidera informasaun falsu tanba nee publiku labele rona identidade falsu neebe akuza ema nia privasidade, tanba sistema rekrutamentu neebe halo laos SEFOPE mesak maibe akompana husi governu Australia, KAK PDHJ neebe involve hodi akompana sistema rekrutamentu sira nee, nune’e sistema neebe dadaun nee uza elektronika hodi halo rekrutamentu diferente ho sistema anterior neebe uza manual tanba nee sistema dadaun nee uza garante transparante iha prosesu rekrutamentu.
“karik ami halo falla ruma hanesan publiku hatene entaun governu Australia halo ona xamada mai iha SEFOPE, tanba nee hanesan membro governu atu husu ba publiku katak karik iha lamentasaun husi kandidatu sira no iha evidensia ruma bele lori ba iha ministeriu publiku wainhira identifika ona maka hau pronto ba presta deklarasaun iha ministeriu publiku” dehan SEFOPE Rogerio Araújo Mendonca ba jornalista sira iha Otel Palm Spring, (24/03).
Nia dehan tan, servisu iha diresaun nasional empregu esterior laos servisu mesak maibe servisu ho Pacific Labour Mobility Suport Program maka servisu hamutuk ho diresaun nee rasik, tanba nee informasaun neebe espalla iha media sosial tanba nee ema neebe espalla informasaun nee bele hatoo keixa iha ministeriu publiku, nunee ema neebe espalla informsaun atu uza identidade loloos labele uza identidade falsu, tanba ema maioria uza ona media sosial tanba nee parte PSIK no PNSIK tenke buka hodi identifika ema sira neebe la hatudu nia identidade loloos hodi hatoo informasaun la tuir kondisaun iha terenu.