Reportajen David da Costa
Iha fulan Abríl tinan ne’e ekipa hosi Repúblika Demokrátika Timor-Leste (RDTL) ho Repúblika Indonézia (RI) sei realiza terseira reuniaun kona-bá Fronteira Maritima (FM) no mós iha novidade katak Prezidente Prabowo Subianto orienta ona ekipa atu finaliza no kompleta mós Fronteira Terrestre Naktuka Oekusse.
Iha komunikadu Imprensa ne’ebe Neon Metin asesu ohin husi Gabinete Primeiru Ministru nian, Embaixadór estraordináriu no plenipotensiáriu ne’ebé reprezenta Timor-Leste (TL) iha Indonézia, Roberto Soares, hateten, ohin mai hato’o Timor-Leste nia preparasaun atu ko’alia ho Indonézia kona-bá Fronteira Marítima nian iha fulan abríl ne’e ba Primeiru Ministru Kay Rala Xanana Gusmão.
“Mai hato’o kona-bá ita nia preparasaun bá ita nia konkordánsia ho Indonézia atu tama bá iha terseira faze reuniaun negosiasaun Fronteiras Marítimas. Ita-nia ekipa ho Indonézia sei hasoru malu fila-fali iha fulan abríl nia laran,” dehan Embaixadór estraordináriu no plenipotensiáriu ne’ebé reprezenta Timor-Leste (TL) iha Indonézia, Roberto Soares, Iha komunikadu Imprensa ne’ebe Neon Metin asesu ohin, 26/03.
Nune’e mos diplomata ne’e atualiza bá Primeiru-Ministru katak, TL iha ona faze konslutasaun kona-bá oinsá bele kompleta prosesu negosiasaun bá Fronteira Terrestre ne’ebé besik tinan ida laiha notísia finalizasaun Fronteiras Naktuka.
“Ohin ita iha ona novidades tanba iha ona informasaun katak, Prezidente Repúblika Indonézia, Prabowo Subianto fó ona instrusaun bá ninia ekipa ne’ebé trata kona-bá asuntu ne’e atu bele hahú fila-fali oinsá ita atu bele avansa bá finalizasaun Fonteira Terrestre kona-bá Naktuka,” nia atualiza.
Tanba ne’e duni maka ohin Roberto Soares mai relata bá Primeiru-Ministru katak, parte TL nian sempre prontu iha kualkér momentu no sempre aposta tuir mekanizmu no regras ne’ebé estabelesidu ona liu-liu kona-bá Lei Internasionál estabelesidu entre Olanda ho Portugál.
Iha oportunidade ne’e Roberto Soares relata mós kona-bá konkordánsia no aseitasaun ida katak, iha loron 20 fulan maiu tinan ne’e sei iha vizita ofisiál ida hosi eis Prezidente Repúblika Indonézia, Megawati Soekarno Putri ne’ebé hola mós papél importante tebtebes iha relasaun bilaterál entre Timor-Leste ho Indonézia.
Tanba iha restaurasaun Independénsia TL nian, Megawati marka prezensa hodi sai sasin no ofisialmente rekoñese katak TL nu’udár país foun no independente iha sékulu 21. Tanba liu tiha fulan balun, liu-hosi Megawati ninia lideransa TL konsege estabelese no normaliza hikas relasaun diplomátika ho Indonézia.
Atualmente enjerál TL ho RI ninia relasaun di’ak tebtebes tanba haree hosi relasaun ema ho ema, Governu ho Governu, Parlamentu ho Parlamentu no mós hosi aspetu ekonomia enjerál.
Iha oportunidade ne’e mós Embaixadór ne’e entrega relatóriu anuál hafoin kompleta servisu tinan ida ne’ebé tuir regras Estadu nian katak kada tinan presiza halo relatóriu no halo kontabilidade relasiona ho servisu no kustu reprezentasaun liga ho orsamentu hodi bele hetan apresiasaun.
Xefe Governu fó orientasaun atu kontinua hametin liu-tán relasaun ne’ebé iha ona no habelar nafatin kooperasaun esepsionál sira ne’ebé iha ona.
Kooperasaun entre Timor-Leste ho Indonézia la’o iha área seguransa, fronteira, ekonomia, infraestrutura, edukasaun, saúde, enerjia ne’ebé ho objetivu prinsipál maka hametin páz, estabilidade no dezenvolvimentu bá nasaun rua nian.
