Reportajen David da Costa
Prezidente Repúblika (PR) José Ramos Horta husu parte relevante sira tenke hasai bebe nurak ne’ebé tama prizaun hamutuk ho nia Inan ho Aman sira i ba kumpri sentensa sala iha prizaun Bekora no Gleno.
“Ne’e tenke haree hasai bebe ne’e, labele, mais problema boot mak ida ne’e, bebe oan ne’e nia sente nia inan, ema seluk kaer nia ne’e psikolójia ne’e nia bele moris ba oin trauma,” dehan Prezidente Republika José Ramos-Horta hafoin partisipa iha inagurasaun edifísiu ADB, iha Faról, Tersa 21/04.
Nia esplika, entaun loloos haree fatin ida iha prizaun ne’ebé ketak, nune’e inan ho nia oan maibé ho kondisaun. maibé bainhira oan ne’e boot ona uitoan tenke haree se mak bele tau matan ba labarik ne’e.
Tanba akompaña problema ne’e seriu, hanesan responsabilidade nu’udar Prezidente. Labarik bebe moris iha prizaun ho nia inan bele afeta nia psikolojia no kresimentu. No labarik ki’ik la bele moris iha ambiente prizaun.
“Ha’u akompaña problema ne’e metin, tanba ha’u nia responsabilidade nu’udar prezidente, la’os fasil, foin daduk ha’u fó indultu ba ama ida iha prizaun, tanba de’it nia oan, nia oan labele moris boot iha prizaun,” hateten Ramos-Horta.
Entertantu antes ne’e, iha loron 20 Abríl 2026, Autoridade Seguransa Diresaun Servisu Investigasaun Kriminal (DSIK) iha Polísia Nasionál Timor-Leste (PNTL), ezekuta mandadu Tribunal Judisial Primeira Instansia Dili (TJPID) detein kondenadu kazál na’in ida ho oan nurak ho naran inisial HX ho MB lori ba kumpri sentensa sala iha prizaun Becora no Gleno.
Kazál na’in rua komete kazu krime Violénsia Domestika akontese iha loron 17 fulan Marsu tinan 2023, iha aldeia, Laloran, Suku Bairo Pite, Postu administrativu Dom Aleixo Munisípiu Dili hasoru vitima lezada inisial Mds to’o baixa iha Hospital Nasional Guidu Valadares (HNGV) lakonsege salva nia vida ne’ebé previstu iha kodigu penal tipu krime iha artigu 146 Ofensa ba integridade fizika maka’as hasoru lezada to’o lakon vida.
Tanba ne’e iha loron 20/04 tuku 09:30, Autoridade Seguransa Diresaun Servisu Investigasaun Kriminal (DSIK) simu ordem hodi ezekuta mandadu Tribunal Judisial Primeira Instansia Dili (TJPID) ho numeru rejistu NUK: 0161/23.DICMR hodi lokaliza kedan kazál nain rua nia hela fatin halo detensaun lori kedan ba kumpri iha Prizaun Becora no Gleno.
Nune’e ida ezekusaun mandadu dahuluk detein suspeitu ho inisial; HX idade 45 iha Aldeia Laloran, Suku Bairo Pite, postu administrativu Dom Aleixo Munisípiu Dili lori ba prizaun sei kumpri nia sal durante tinan 7 no supeitu inisial MB idade 41 inan nurak iha Fatuquero, postu administrativu Gleno Munisípiu Ermera lori ba prizaun sei kumpri nia sala iha prizaun durante tinan lima.
Iha prosesu ezekuta mandadu Tribunal Judisial Primeira Instansia Dili (TJPID) lao ho diak, tanba suspeitu kazál nain ida no oan nurak ho nia bebe foin halo fulan rua kopera diak ho ekipa Diresaun Servisu Investigasaun Kriminal (DSIK) hodi lori ba kumpri iha prizaun.