Reportajen estajiadu Isack Sarmento
Centro Nacional Chega! (CNC) realiza eventu festival literasia durante loron tolu hodi promove istória Timor-Leste liuhusi dalan kreativu sira, nune’e iha mós diskusaun entre estudante sira ho CNC konaba relatoriu Chega no mós temátiku balun, nune’e Segundu Vise Primeiru Ministru Mariano ‘Assanami’ Sabino Solisita ba estudante sira partisipa iha festival refere atu hatoman an lee livru hodi sai hanesan kultura ida hodi labele dependente de’it ba plataforma dijital sira.
Diretór Ezekutivu CNC Hugo Fernandez dehan, festival literasia ida ne’e realiza durante loron tolu nia laran ho objetivu ida atu estimula foinsa’e sira nia hanoin hodi hatene istória liuhusi atividade kreativu sira, festivál ne’e mós sei iha diskusaun konaba relatoriu Chega, diskusaun konaba livru sira ne’ebé mak produz hodi estimula foinsa’e sira-nia koñesementu.
“Atividade ida ne’e parte husi atividade extra nian ida ne’ebé mak promove istória liuhusi dalan kreativu sira, atividade konaba memoria iha kretivu, CNC mós tuir lei tenke buka rendimentu tenke buka orsamentu entaun atividade ida ne’e mós parte ida oinsá ita promove capital sira ne’ebé mak durante ne’e jere, salaun ema mai aluga ita-nia osan simu balun husi ne’e no fasildade sira seluk, iha loron tolu sei iha diskusaun pois esplika liután bá estudante sira, foinsa’e sira oinsá mak sira intende relatoriu Chega ho di’ak liután”dehan Diretór Ezekutivu CNC Hugo Fernandes iha salaun CNC Balide, (21/05).
Fatin hanesan, Segundu Vice Primeiro Ministro Mariano ‘Assanami’ Sabino liuhusi nia diskursu hateten, lee ne’e importante tebes tanba nee tenke nafatin foti sai hanesan kultura ida, dalaruma plataforma modernu sira ne’ebé mak fasil tebes influensia foinsa’e sira entaun sira dependente de’it ona bá plataforma hirak ne’e no la tau importansia bá lee hodi transforma kakutak ne’e ho di’ak.
“Lee nafatin tenke sai kultura iha ita-nia aan dalaruma ita agora ho Tik-tok ho média ho video ne’ebé que prepara, ho buat hotu ne’ebé fasil tebes, internet bele fó dalaruma ita haluha tiha lee, mais lee n’e fundamentu para forma ita-nia luta iha kakutak ne’e lae kakutak hetan fasil de’it, buat hot-hotu ema nian ita dekór de’it koalia, hanesan ita atu diskursu mós ó bá AI prepara hotu ona iha ne’ebá, mais halo ó-nia kakutak ne’e la’os hanesan lutadór ona”dehan Vise PM Assanami
Nia dehan tán, Timor-leste hanesan rai ki’ik ida maibé konsege esforsu manan funu ne’e ho modalidade lee, modalidade aprende, modalidade estuda, modalidade disiplina no modalidade haka’as aan tanba ne’e sociedade sira tenke tau importansia bá lee hodi halo inovasaun, nune’e nia dehan nasaun sira hanesan Singapura, Corea, japaun inklui Izrael nasaun ki’ik maibé sira bele kontrola ida ne’e tanba sosiedade sira lee barak no peskiza maka’as, tanba nasaun atu avansa bá oin ne’e presija lee no peskiza.
“Importante teb-tebes para ita lee ita-nia istória ne’e atu foti valores ne’ebé relevante fali ho aktualiza bá imi-nia situasaun fali, situasaun ita-nian ne’ebé que diferente la’os ona kaer kilat la’os ona presija klandestina mais hatudu imi-nia personalidade imi-nia integridade imi-nia kakutak para atu debate mai husi lee, sé ó lee barak ó debate saidá de’it ne’e mosu iha ne’e, dalaruma ó koalia ho haksoit tanba nia mosu lalais liu iha kakutak” nia hatután
Enkuantu, estudante Universidade da Paz (UNPAZ) Andrade Viegas hanesan partisipante iha atividade refere Dehan festival literasia ne’e importante tebes bá estudante no jerasaun foun sira atu banati tuir istória luta nian hodi halo dezenvolvimentu bá nasaun ida ne’e, liuhusi festival ne’e mós bele ajuda joven sira tanba bele kapasita no amenta sira-nia koñesementu ne’ebé mak iha.