Reportajen Estajiáriu Cristiano do R. Gama
Governu Brazíl liuhosi nia Embaixadór iha Timor-Leste, hasoru malu Presidente Republika (PR) José Ramos-Horta hodia ko’alia kona-ba atu hametin no alarga liután kooperasaun bilaterál ho Timor, liuliu iha setór edukasaun no justisa atu reforsa setór judisiáriu sira iha Timor-Leste.
Embaixadór Brazil mai Timor-Leste, Ricardo Leal hatete, Brazíl akompaña situasaun kooperasaun nian ne’ebé la’o daudaun ona iha Timor, hodi foka liu ba projetu sira ne’ebé hamutuk ho Ministériu Edukasaun iha Timor-Leste.
“Iha momentu ne’e, buat ne’ebé Brazíl halo daudaun mak foka liu ba reforsa difuzaun lian Portugés iha Timor-Leste, liuhosi projetu ida ne’ebé la’o daudaun ona nia implementasaun hamutuk ho Ministériu Edukasaun,” dehan Embaixadór Brazil Ricardo Leal iha palásiu Prezidensial Bairo-Pite, sexta 22/05.
Aleinde setór edukasaun, iha mos posibilidade boot atu halo kooperasaun seluk hanesan robustesimentu setór judisiáriu no Defensoria Públika, ne’ebé agora daudaun sukat no tetu hela hosi parte nasaun rua nian.
Embaixadór hato’o mensajen amizade no harmonia husi Prezidente Repúblika no destaka orgullu Brazíl nian tanba hetan apoiu husi Timor-Leste ba inisiativa no prioridade sira Brazíl nian iha fórum no kooperasaun multilateral.
“Brazíl sente orgullu boot tanba bele konta ho apoiu hosi Timor-Leste iha inisiativa no mós rekezitu sira Brazíl nian iha planu multilateral,” nia subline.
Kooperasaun ne’e hatudu katak ligasaun diplomátika entre nasaun rua ne’e la’ós de’it metin iha kestaun bilaterál, maibé mós iha nívél internasionál hodi apoiu malu ba diplomasia mundiál.
