Reportajen David da Costa
Jenerál Reformadu, atual Asesor Polítiku Prinsipal ba Prezidente Repúblika (PR) José Ramos-Horta, kritika protokolu iha serimónia Restorasaun Indepedensia 20 Maiu ba dala 24 iha Tasi Tolu, Tanba lider nasional hanesan eis PR, Francisco Guterres Lu-Olo no eis Primeiru Ministru (PM) Taur Matan Ruak la hetan fatin ne’ebe merese tuir sira nia kontribuisaun istórika no dignidade nu’udar lider nasaun.
Jenerál Reformadu, Lere Anan Timur, atual Asesor Polítiku Prinsipal ba Prezidente Repúblika, hatete, maske organizasaun protokolu iha serimónia bele tuir regra ofisiál sira, lider Estadu hanesan Prezidente no Primeiru Ministru tenke konsidera mós aspetu moral hodi fó respeitu no valorizasaun ba veteranu sira, maibé mos lider nasional sira.
Nia refere liuliu ba situasaun ne’ebe nia observa durante serimónia 20 maiu iha Tasi Tolu, bainhira eis Prezidente Repúblika Francisco Guterres Lu-Olo no eis Primeiru Ministru Taur Matan Ruak, tuur iha área ne’ebe la reflete sira nia papel istóriku iha prosesu libertasaun no dezenvolvimentu nasaun.
“Imi iha ne’eba haree de’it, Maun Taur ho Maun Lu-olo nu’udar eis titulares tuur iha kraik, dala ruma sira nia fatin iha leten,” dehan Jenerál Reformadu, Lere Anan Timur, atual Asesor Polítiku Prinsipal ba PR, bainhira sai oradór iha seminar kona-ba Konsolidasaun entre Estadu no Akademista hodi mantein Resiliente Dezenvolvimentu no Sustentabilidade ba Nasaun Palásiu Prezidensiál, Salaun China, Tersa 26/05
Lere Anan manifesta tristeza ba forma aplikasaun protokolu iha serimónia 20 Maiu iha Tasi Tolu, tanba nia haree katak protokolu sai instrumentu atu haketak lider istóriku sira husi fatin ne’ebe reflete sira nia estatutu no servisu ba nasaun.
“Hanesan foin dadauk iha serimonia 20 maiu, ha’u triste, ha’u atu sai, Tanba saida? Lei protokolar ne’e hakarak atu haketak ona ita nia lider sira husi ambiente ida ne’e,” nia dehan.
Maibé nia mos husu ba sidadaun sira hotu-hotu, liuliu joven no intelektual sira hotu, atu presiza kontinua valoriza no fó respeitu ba lider nasional ka lider istóriku sira hotu ne’ebe partisipa iha luta ba ukun-rasik-an
“Husu ba liu-liu joven sira, intelektuais katak atu sai sidadaun di’ak agora, foti aas imi nia lider sira ne’ebe-ke hari nasaun ida ne’e,” nia afirma.
Tanba ne’e, autoridade kompetente sira avalia fila-fali prátika protokolu iha eventu ofisiál sira atu asegura katak formalidade administrativu no respeitu moral ba lider nasaun bele la’o hamutuk ho ekilíbriu.